17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
Շվեդիայի Ազգային դատարանների ադմինիստրացիան ՀՀ-ում կիրականացնի վերապատրաստումների ծրագիր
Հասարակություն
21.04.2022 | 20:19
Դատական համակարգի թափանցիկության ապահովման շրջանակներում ՀՀ Արդարադատության նախարարի տեղակալ Գրիգոր Մինասյանը և «Օրենսդրության զարգացման և իրավական հետազոտությունների կենտրոն» հիմնադրամի տնօրեն Տիգրան Դադունցն այսօր ընդունել են Շվեդիայի Ազգային դատարանների (SNCA) ադմինիստրացիայի ներկայացուցիչներ Բյորն Լինդենին (դատական համակարգի նոր ակնկալիքները բավարարելու և դատական համակարգի նկատմամբ հանրային վստահության ամրապնդման նպատակով հայաստանյան դատավորների կարողությունների ընդլայնման ծրագրի ղեկավար) և Լյուդվիգ Բեքինգին (SNCA ծրագրի համակարգող և իրավախորհրդատու)։
ԱՆ հաղորդմամբ՝ շվեդական պատվիրակության ներկայացուցիչները շնորհակալություն են հայտնել հանդիպման համար և ներկայացրել այն ծրագրերը, որոնք մտադիր են իրականացնել Հայաստանում՝ դատական համակարգին աջակցության ծրագրի շրջանակներում:
Մասնավորապես, շվեդական կողմն իր պատրաստակամությունն է հայտնել` կիսվելու արդարադատության ոլորտում իր փորձով, այդ թվում՝ դատավորների պրոֆեսիոնալիզմի և նրանց նկատմամբ հանրային վստահության բարձրացման ուղղություններով, որտեղ կարևորվել է նաև մեդիայի դերը։
Շվեդիայի Ազգային դատարանների ադմինիստրացիայի ներկայացուցիչները ներկայացրել են իրենց վերապատրաստումների ծրագիրը, որը կրելու է շարունակական բնույթ և ընդգրկելու է թե՛ գործող դատավորներին, թե՛ դատավորների թեկնածուներին։ Վերապատրաստումներն իրականացվելու են Արդարադատության ակադեմիայի միջոցով: Գործընթացին ներգրավված են լինելու նաև ոլորտի փորձագետներ:
Փոխնախարար Գրիգոր Մինասյանն իր հերթին հայտնել է, որ ՀՀ-ում արդեն իսկ ընթացքի մեջ են դատաիրավական բարեփոխումների իրականացման աշխատանքները:
Դատական համակարգի թափանցիկության ապահովման համատեքստում քննարկվել են նաև Բարձրագույն դատական խորհրդի նյութատեխնիկական ապահովվածության, մեդիայի և դատավորների հետ աշխատանքներ իրականացնելու անհրաժեշտության և այլ հարցեր:
Գրիգոր Մինասյանը մտահոգություն է հայտնել, որ այժմ առկա են դատավորների թափուր հաստիքներ, սակայն չկան դիմողներ։ Շվեդական կողմն այս մասով ընդգծել է դատավորի աշխատանքի նկատմամբ հանրային վստահության բարձրացման և հարգանքի ամրապնդման, ինչպես նաև նիստերի քանակի նվազեցման անհրաժեշտությունը:
Երկուստեք ընդգծվել է համագործակցության շարունակականության կարևորությունը։
