27.03.2026 | 23:30
Պորտուգալիայում քահանաների կողմից սեռական բռնության զոհերին ավելի քան 1,6 միլիոն եվրո փոխհատուցում է հատկացվել
Թուրքիայի ընդդիմության առաջնորդը հայտարարել է, որ Հրանտ Դինքի սպանությունը բացահայտված չէ
Քաղաքականություն
18.04.2022 | 22:25
Թուրքիայի գլխավոր ընդդիմադիր Ժողովրդահանրապետական կուսակցության նախագահ Քեմալ Քըլըչդարօղլուն այցելել է «Հրանտ Դինք» հիմնադրամ, որտեղ հանդիպել է Դինքի կնոջը՝ Ռաքել Դինքին և որդուն՝ Արատ Դինքին, գրում է Agos-ը։
Այցի ընթացքում Քըլըչդարօղլուին ուղեկցել են կուսակցության Ստամբուլի նահանգային բաժնի ղեկավար Ջանան Քաֆթանջըօղլուն և պատգամավոր Սեզգին Թանրըքուլուն։ Նրանք նաև հայ համայնքին շնորհավորել են Սուրբ Զատկի տոնի կապակցությամբ։
Միաժամանակ, Քըլըչդարօղլուն մամուլի համար հայտարարություն է արել՝ նշելով, որ Հրանտ Դինքի սպանությունը բացահայտված չէ։ Նա նշել է, որ իշխանության գալու դեպքում պայքարելու են «մութ ուժերի կենտրոնների դեմ», և որ բոլորն ուզում են ապրել միասնության և խաղաղության մեջ։
«Հանգուցյալ Հրանտ Դինքի մարդասպանը բանտում է, սակայն իրական մարդասպանները չեն հայտնաբերվել և բացահայտվել։ Տիկին Ռաքելը շատ լավ խոսք ունի՝ «երեխայից մարդասպան ստեղծող այդ խորը խավարը»։ Պետք է անպայման լուսավորենք այդ խորը խավարը, որը համագործակցում է ավազակախմբերի և ընդհատակյա ուժերի հետ։ Պետության մեջ արմատացած այդ մարդկանց պետք է դուրս հանենք պետությունից։ Այդ ժամանակ մենք այս երկրում խաղաղություն կունենանք»,- ասել է Քըլըչդարօղլուն։
Էմմա Չոբանյան
