«Ձախողում ենք Գյումրու կառավարումը»․ Շիրակի մարզպետի հարազատները հեռանում են պաշտոններից

Շիրակի մարզպետ Նազելի Բաղդասարյանի եղբայրը՝ Գյումրու ավագանու ՔՊ-ական անդամ Արման Բաղդասարյանը, և նրա կինը՝ Անի Քոչարյանը, որը 5 ամիս է, ինչ զբաղեցնում է համայնքապետարանի աշխատակազմի ծրագրերի և արտաքին կապերի բաժնի պետի ժ/պ-ի պաշտոնը, երեկ հրաժարական են ներկայացրել։

Արման Բաղդասարյանը ֆեյսբուքյան իր էջում տեղեկացրել էր, որ վայր է դնում իր մանդատը, միաժամանակ հեռանում «Քաղաքացիական պայմանագիր» կուսակցության շարքերից։
Նրա կինն էլ՝ Անի Քոչարյանը, գրել էր, որ հեռանում է քաղաքապետարանից՝ սեփական դիմումի համաձայն։

Նույն օրվա ընթացքում ամուսինների հրաժարական ներկայացնելը բուռն քննարկումների առիթ է դարձել Գյումրիում, շատերն են մեզ ահազանգում ու հետաքրքրվում՝ ո՞րն է իրական պատճառը, գուցե ստիպել են լքել պաշտոնները, գուցե կոնֆլիկտ է եղել Գյումրու քաղաքապետարանի ներսում։ Հարցնում են՝ եթե մարզպետի եղբայրը վայր է դնում ավագանու իր մանդատը, ապա իմաստը ո՞րն է ՔՊ-ի շարքերից դուրս գալու։

Մենք փորձեցինք պարզաբանումներ ստանալ հենց նրանցից։ Արման Բաղդասարյանը փոխանցեց, որ ավելին չունի ասելու, քան գրել է իր ֆեյսբուքյան էջում, իսկ նրա կինն առհասարակ պարզաբանելու ցանկություն չունի։

Արման Բաղդասարյանը ֆեյսբուքյան էջում երեկ կեսգիշերին գրել էր․ «Տարբեր շահարկումներից զերծ մնալու համար ու չբացելով շատ փակագծեր՝ ներկայացնեմ ձեզ իմ դիմումների ընդհանուր պատճառը։
Ըստ իս, մենք ձախողում ենք քաղաքի կառավարումը, ուստի ես ընդունում եմ մեղքի իմ բաժինը և կրում պատասխանատվություն իմ մասով։

Համապատասխան դիմումը ներկայացրել եմ վարչության նախագահի անունով, թե ինչ կորոշի վարչությունը, հավելյալ կտեղեկացնեմ։
Անկախ զարգացումներից՝ ինքս մնացել եմ հեղափոխության գաղափարների ու արժեքների կրողը»։

Թե ինչո՞ւ է աշխատանքից ազատման դիմում ներկայացրել նրա կինը՝ Անի Քոչարյանը, այս հարցով դիմեցինք Գյումրու քաղաքապետի մամլո խոսնակ Սոնա Առաքելյանին։
Վերջինս նշեց միայն, որ Անի Քոչարյանը դուրս է եկել աշխատանքից՝ սեփական դիմումի համաձայն։
Ի դեպ, մենք պարզեցինք, որ կարճ պաշտոնավարման ընթացքում Անի Քոչարյանը երկրորդ անգամ է հրաժարականի դիմում ներկայացնում Գյումրու քաղաքապետին։ Նրա առաջին դիմումը չի ընդունվել քաղաքապետ Վարդգես Սամսոնյանի կողմից։ Մեզ առաջին հրաժարականի պատճառի մասին ևս պաշտոնապես տեղեկություն չտրամադրեցին։

Արմիկ Մովսիսյան