Վաշինգտոնում հայտարարել են, որ Թուրքիան առանցքային ներդրում է ունեցել Ուկրաինայի հարցում

ԱՄՆ-ը պաշտպանում է ՆԱՏՕ-ի դաշնակից Թուրքիային այն բանից հետո, երբ վերջինս դիմադրում է Ուկրաինայում պատերազմի պատճառով Ռուսաստանի կամ ռուս օլիգարխների դեմ պատժամիջոցներ կիրառելու ճնշումներին, գրում է «Ահվալ» գործակալությունը։

Մասնավորապես, ԱՄՆ Պետքարտուղարության մամուլի խոսնակ Նեդ Փրայսը ճեպազրույցում հայտարարել է, որ Թուրքիան ՆԱՏՕ-ի կարևոր դաշնակիցն է և առանցքային ներդրում է ունեցել Ուկրաինայի հարցում, այդ թվում՝ աշխատելով պատերազմող կողմերի միջև դիվանագիտական լուծում գտնելու ուղղությամբ։

«Թուրքիան կարևոր ներդրում է ունեցել ուկրաինացի ժողովրդին աջակցելու և Ռուսաստանին պատասխանատվության ենթարկելու ջանքերում։ Թուրքերը նաև շատ կարևոր դիվանագիտական դերակատարում են ունեցել՝ ձգտելով համախմբել ռուսներին և ուկրաինացիներին՝ որևէ դիվանագիտական առաջընթաց տեսնելու համար»,- ասել է Փրայսը։

Հավելենք, որ Թուրքիան հրաժարվում է պատժամիջոցներ սահմանել Ռուսաստանի դեմ, հակառակը հրավիրում է ռուս օլիգարխներին և բիզնեսին Թուրքիայում ներդրումներ կատարել։

Փրայսը նաև նշել է, որ ԱՄՆ-ը շարունակում է Թուրքիայի հետ բանակցել ռուսական C-400 համակարգերի շուրջ։

«Մենք մեր թուրք դաշնակիցների հետ շարունակական քննարկման մեջ ենք՝ Թուրքիայի կողմից C-400 համակարգերի հետ կապված մեր մտահոգությունների շուրջ, և դա շարունակական շփում է»,- ասել է Փրայսը:

Նա հրաժարվել է մեկնաբանել՝ արդյո՞ք Թուրքիայի նկատմամբ ԱՄՆ-ի սահմանած պատժամիջոցները վերացվելու են։

Էմմա Չոբանյան