16.09.2026 | 16:54
Քաղցրաշենի մանկապարտեզի շենքում օձ է նկատվել․ երեխաներին տարհանել են
Լեհաստանի և Բալթյան երկրների նախագահները ժամանել են Կիև
Քաղաքականություն
13.04.2022 | 17:56
Լեհաստանի և Բալթյան երկրների՝ Լիտվայի, Լատվիայի և Էստոնիայի նախագահները ժամանել են Կիև։ Այս մասին հայտնել է Լեհաստանի ղեկավարի մամուլի ծառայությունը, գրում է korrespondent-ը։
«Նախագահ Անջեյ Դուդան Էստոնիայի նախագահ Ալար Կարիսի, Լատվիայի նախագահ Էգիլս Լևիտսի և Լիտվայի նախագահ Գիտանաս Նաուսեդայի հետ միասին արդեն Կիևում են, որտեղ կհանդիպեն Ուկրաինայի նախագահ Վլադիմիր Զելենսկու հետ»,- ասվում է հաղորդագրության մեջ։
Նշվում է, որ չորս երկրների ղեկավարները ժամանել են Ուկրաինային քաղաքական և խորհրդանշական աջակցությամբ, ինչպես նաև Ուկրաինայի զինված ուժերին նյութական աջակցություն տրամադրելու շուրջ բանակցությունների համար։ Աղբհորի հրապարակած լուսանկարում երևում է, թե ինչպես են պետությունների ղեկավարները դուրս գալիս գնացքի վագոնից։ Նրանց կայարանում դիմավորել է վարչապետ Դենիս Շմիգալը։
Հիշեցնենք՝ Ուկրաինայում ռազմական գործողությունների մեկնարկից հետո Մեծ Բրիտանիայի վարչապետ Բորիս Ջոնսոնն անցած շաբաթավերջին այցելել էր Կիև։ Նա խոստացել է Ուկրաինային զրահատեխնիկա և հականավային հրթիռներ տրամադրել պաշտպանության համար, ինչպես նաև հայտարարել է Ուկրաինայի հետ առևտուրն ազատականացնելու պատրաստակամության մասին։
Գնացքով Կիև էր այցելել նաև Եվրահանձնաժողովի ղեկավար Ուրսուլա ֆոն դեր Լայենը։ Պատվիրակության կազմում են եղել Եվրամիության դիվանագիտության ղեկավար Ժոզեպ Բորելը, Սլովակիայի վարչապետ Էդուարդ Հեգերը և Եվրախորհրդարանի մի շարք պատգամավորներ։ Մարտի կեսերին գնացքով Կիև էին մեկնել նաև Լեհաստանի, Սլովենիայի և Չեխիայի վարչապետները։
Տաթև Ֆռանգյան
