Ուկրաինայում պատերազմի ֆոնին ԱՀԿ-ն նվազեցրել է համաշխարհային առևտրի աճի կանխատեսումը

Առևտրի համաշխարհային կազմակերպությունը կտրուկ նվազեցրել է համաշխարհային առևտրի կանխատեսնումները Ուկրաինա ռուսական ներխուժումից հետո՝ զգուշացնելով, որ աշխարհը պետք է պատրաստվի հետևանքներին, գրում է CNN-ը։

«Կազմակերպությունն այժմ ակնկալում է ապրանքների առևտրի ծավալի 3.0% աճ 2022 թվականին՝ նախկին 4.7% կանխատեսման համեմատ, իսկ 2023 թվականին՝ 3.4%, սակայն այս գնահատականները սովորականից ավելի պակաս որոշակի են հակամարտության հեղհեղուկ բնույթի պատճառով»,- ասվում է կազմակերպության մամուլի հաղորդագրությունում։

ԱՀԿ-ն նշում է, որ ամենամեծ ազդեցությունն ապրանքների գնաճի տեսքով է, քանի որ Ռուսաստանն ու Ուկրաինան ապրանքների առանցքային մատակարարներ են, այդ թվում՝ պարենի, էներգետիկայի ու պարարտանյութերի, իսկ մատակարարումները հիմա խաթարվել են պատերազմի պատճառով։

«Ուկրաինայի պատերազմը մարդկային հսկայական տառապանք է առաջացրել, բայց այն նաև վնասել է համաշխարհային տնտեսությունը կրիտիկական փուլում: Դրա ազդեցությունը կզգացվի ամբողջ աշխարհում, հատկապես՝ ցածր եկամուտ ունեցող երկրներում, որտեղ սնունդը կազմում է տնային տնտեսությունների ծախսերի մեծ մասը: Ավելի փոքր ծավալով մատակարարումներն ու բարձր գները նշանակում են, որ աշխարհի աղքատները կարող են մնալ առանց սննդի։ Դա չպետք է թույլ տալ»,- ասել է կազմակերպության գլխավոր տնօրեն Նգոզի Օկոնյո Իվաելան։

Նա նախազգուշացրել է, որ սպասվում է պոտենցիալ պարենային ճգնաժամ, և աֆրիկյան 35 երկրներ, որոնք սնունդ են ներմուծում Ուկրաինայից կամ Ռուսաստանից, կամ էլ՝ միաժամանակ երկուսից, լրջորեն տուժել են՝ հատկապես նշելով Եգիպտոսը և Թունիսը:

Էմմա Չոբանյան