16.09.2026 | 16:20
Կոսովոյի նախկին նախագահ Հաշիմ Թաչին ռազմական հանցագործությունների համար դատապարտվել է 25 տարվա ազատազրկման
Թուրքերի շուրջ 60 տոկոսը չի կարողանում ծայրը ծայրին հասցնել․ նոր հետազոտություն
Քաղաքականություն
05.04.2022 | 23:30
Ստամբուլի տնտեսական հետազոտությունների ընկերության կողմից մարտին անցկացված հարցման համաձայն՝ Թուրքիայում քաղաքացիների 59,4 տոկոսը չի կարողանում ծայրը ծայրին հասցնել, գրում են թուրքական լրատվամիջոցները։ Հարցման արդյունքները ներկայացրել է ընկերության գործադիր տնօրեն Ջան Սելջուկը սոցիալական ցանցերում։
Հետազոտության մասնակիցներին տրվել է չորս հարց՝ մարտին իրենց եկամուտ-ծախսերի հաշվեկշռի վերաբերյալ։ Մոտ 59 տոկոսը պատասխանել է, որ եկամուտը չի բավարարում ծախսերին, մինչդեռ 27 տոկոսն ասել է, որ իրենց եկամուտը բավարար է միայն ծախսերը հոգալու համար: 7 տոկոսն ասել է, որ իրենց եկամուտը ավելին է, քան ծախսերը, 6 տոկոսն էլ ասել է, որ իրենց եկամուտն ավելի քան բավարար է ծախսերը հոգալու համար:
Մասնակիցներին հարցրել են նաև, թե ո՞ր կուսակցության օգտին են քվեարկել։ Մինչ իշխող «Արդարություն և զարգացում» կուսակցության ընտրողների 40,7 տոկոսը նշել է, որ դժվարացել է հոգալ իրենց ծախսերը, այս ցուցանիշը շատ ավելին է ընդդիմադիր կուսակցությունների կողմնակիցների դեպքում: Մասնավորապես, գլխավոր ընդդիմադիր Ժողովրդահանրապետական կուսակցության ընտրողների մոտ 73,4 տոկոսն ասել է, որ իրենց եկամուտները չեն բավարարում ծախսերի համար, Ժողովուրդների դեմոկրատական կուսակցության աջակիցների դեպքում այս ցուցանիշը կազմում է 88,4 տոկոս, իսկ İYİ («Լավ») կուսակցության համակիրների դեպքում՝ 80,4 տոկոս։
Նշենք, որ Թուրքիայի վիճակագրական ինստիտուտի տվյալների համաձայն՝ մարտին Թուրքիայում սպառողական գների տարեկան գնաճը հասել է 61,14 տոկոսի, ինչը ամենաբարձր ցուցանիշն է վերջին երկու տասնամյակի ընթացքում:
Էմմա Չոբանյան
