10.10.2026 | 13:51
Ավինյանը շնորհավորել է Երևանի տոնը՝ կոչ անելով երևանցիներին դուրս գալ քաղաք և մասնակցել տոնակատարություններին
Գերմանիայի ռազմական տեխնիկայի վաճառքը Թուրքիային ռեկորդային նվազագույնի է հասել 1999թ․ ի վեր
Քաղաքականություն
05.04.2022 | 23:06
Գերմանիայի կառավարությունը հավանություն է տվել 2021 թվականին Թուրքիային 11 միլիոն եվրոյի զինտեխնիկայի վաճառքին, ինչը 1999 թվականից ի վեր գրանցված ամենացածր ցուցանիշն է: Այս մասին գրում է Deutsche Welle-ի թուրքական ծառայությունը, որին վկայակոչում է Turkishminute-ը։
Աղբյուրը նշում է, որ Գերմանիայի Դաշնային կառավարությունը տեղեկությունը տրամադրել է՝ ի պատասխան Ձախերի կուսակցության պատգամավոր Սևիմ Դաղդելենի կողմից առաջադրված հարցի, և ասել, որ 11 միլիոն եվրոյի վաճառքից ռազմածովային արտահանումը կազմում է 6 միլիոն եվրո։
Համեմատության համար նշենք, որ 2017-2021 թվականներին, նախկին կանցլեր Անգելա Մերկելի պաշտոնավարման վերջին ժամանակահատվածում, Թուրքիան Գերմանիայից ներմուծել է 4,5 միլիարդ եվրոյի զենք և ռազմական տեխնիկա:
2019 թվականին, երբ Սիրիայում տեղի ունեցավ թուրքական օպերացիան, Գերմանիան սահմանափակեց զենքի արտահանումը Թուրքիա՝ որոշելով չվաճառել զենք, որը կարող է օգտագործվել սիրիական պատերազմում:
2019-ին Սիրիայում Թուրքիայի «Խաղաղության աղբյուր» գործողությունից հետո Չեխիան, Ֆինլանդիան, Նիդեռլանդները, Նորվեգիան, Իսպանիան և Շվեդիան զենքի էմբարգո սահմանեցին Թուրքիայի նկատմամբ։
Բացի այդ, Ֆրանսիան սահմանափակել էր պաշտպանական և ավիացիոն ենթահամակարգերի վաճառքը, իսկ Իտալիան և Բրիտանիան արգելել էին որոշ ապրանքների վաճառքը։ Գերմանիան կասեցրել էր թուրքական Leopard-2 տանկերի արդիականացման ծրագրերը և սահմանափակել այլ սարքավորումների վաճառքը։
Թուրքական գործողությունների պատճառով ֆրանս-իտալական Eurosam SAMP/T հակաօդային պաշտպանության համակարգի համատեղ արտադրության ծրագիրը ևս կասեցվել էր, որի վերագործարկման շուրջ այժմ կողմերը բանակցում են։
Էմմա Չոբանյան
