02.03.2026 | 23:40
Հայաստանի մի շարք հասցեներում էլեկտրաներգիայի անջատումներ կլինեն
Նոր փաստաթուղթ ստորագրվելո՞ւ է. Փաշինյան-Ալիև հանդիպումից ինչ են սպասում ՀՀ-ի և Արցախի պաշտոնյաները․ ՏԵՍԱՆՅՈւԹ
Քաղաքականություն
04.04.2022 | 22:50
Ապրիլի 6-ին Բրյուսելում սպասվում է Փաշինյան-Ալիև հանդիպումը։ Խորհրդարանական ընդդիմությունը մտահոգություն ունի, որ այդ օրն Արցախի համար ոչ բարենպաստ օրակարգի շուրջ կարող է քննարկում ծավալվել, մասնավորապես՝ ստորագրվի մի փաստաթուղթ, որով իրականում ոչ թե իշխանության կողմից բազմիցս հայտարարված խաղաղության օրակարգն իրականություն կդառնա, այլ Արցախի ամբողջական կորուստ կլինի։
«Հայաստան» խմբակցության պատգամավոր Գեղամ Նազարյանն ասում է՝ խաղաղությանը դեմ չեն, բայց խնդիրը ոչ թե ամեն գնով, այլ արժանապատիվ խաղաղության հասնելու մեջ է։
«Չլինի Թումանյանի ստեղծագործության՝ կկվի և աղվեսի պատմությունը։ Դրա համար ուղերձ ենք հղում վարչախմբին, որ իրենց մանդատ չի տրվել ստորագրելու թուղթ, որով կամրագրվի Արցախի կարգավիճակն այս կամ այն կերպ Ադրբեջանի կազմում»,- նշում է նա։
Նազարյանը շեշտում է՝ սպասվող հանդիպմանն ընդառաջ՝ քաղաքացիների շրջանում մտահոգություն կա, քանի որ նախորդիվ այլ կարևոր փաստաթղթերի գոյության մասին հանրությունը տեղեկացել է միայն ստորագրումից հետո։ Իշխանական պատգամավոր Ռուստամ Բաքոյանը, սակայն, համամիտ չէ, թե հանրությունն այս հարցով մտահոգված է կամ դրա համար հիմքեր ունի։
«Ես տրամաբանությունը չեմ հասկանում, երբ երկրի ղեկավարը գնում է բանակցելու, պետք է ամբողջ պրոցեսը պատմի, հետո գնա՞։ Ցանկացած հանդիպում Արցախի խնդրի կարգավորմանն է ուղղված, և ինչ-որ փուլում փաստաթղթեր պետք է ստորագրվեն»,- ասաց նա։
Բաքոյանը, սակայն, չհստակեցրեց՝ ապրիլի 6-ին փաստաթղթի ստորագրման հարց լինելո՞ւ է սեղանին, թե՞ ոչ։ Իսկ ինչ տեղեկություն ունի բրյուսելյան հանդիպման վերաբերյալ պաշտոնական Ստեփանակերտը։ Արցախի արտգործնախարար Դավիթ Բաբայանը Factor TV-ի հետ զրույցում փաստաթղթի հնարավոր ստորագրման վերաբերյալ հարցին չպատասխանեց, փոխարենը նշեց Արցախի՝ այդ հանդիպումից ակնկալիքների մասին։
Մանրամասները՝ տեսանյութում։
Մերի Մարտիրոսյան
