22.01.2026 | 12:36
Կրասնոդարի նավահանգստային տերմինալների վրա հարձակման հետևանքով 3 զոհ կա
Կկայանան արդյոք նոր բանակցություններ Նիկոլ Փաշինյանի և իշխանության միջև․ քաղաքագետների արձագանքը
Քաղաքականություն
25.04.2018 | 15:18
Հեղափոխությունը շարունակվում է ու կշարունակվի, այն ունի շատ լուրջ առաջնորդ, և ես հույս եմ հայտնում, որ ամեն ինչ կավարտվի առանց զոհերի. նման տեսակետ հայտնեց ՀՀ ԳԱԱ արևելագիտության ինստիտուտի տնօրեն, ակադեմիկոս Ռուբեն Սաֆրաստյանը FactorTV-ի հետ զրույցում:
Սաֆրաստյանը կարծում է, որ Կարեն Կարապետյանի առաջարկը` նստել սեղանի շուրջ բանակցության, ուշացած է, և Նիկոլ Փաշինյանը չի համաձայնվի:
Մինչդեռ քաղաքագետ Արմեն Բաղդասարյանը հույս է հայտնում, որ բանակցությունները չեն դադարեցվել, ընդամենը ընդհատվել են:
«Ողջամիտ եմ համարում, որ պետք է նստել սեղանի շուրջ բանակցության: Իրավական տեսակետից Կարեն Կարապետյանի փաստարկները մեծ մասամբ ընդունելի էին, բայց իրական քաղաքական տրամաբանության տեսակետից պետք է ընդունել Նիկոլ Փաշինյանի օրակարգը, որովհետև դա է թելադրում ռեալ քաղաքական իրավիճակը»,- ասաց Արմեն Բաղդասարյանը FactorTV-ի հետ զրույցում:
Անդրադառնալով միջազգային հանրության արձագանքին` Բաղդասարյանը թե՛ Ռուսաստանի, թե՛ Արևմուտքի գնահատականները որակեց հավասարակշռված և օբյեկտիվ. «Դա համարում եմ ապացույց այն բանի, որ շարժումը արտաքին ուժերի կողմից չի ուղղորդվել և արտաքին միջամտություն չի եղել»:
Ռուբեն Սաֆրաստյանը նույնպես համակարծիք է և շեշտում է, որ միջազգային խաղացողները շատ սթափ մոտեցում են ցուցաբերում այս օրերին: «Նրանք հասկանում են, որ սա Հայաստանի ներքին գործն է: Ես որևէ միջամտություն չեմ տեսնում և հույս ունեմ, որ այդ սթափ վերաբերմունքն ու մոտեցումը կշարունակվի»,- հավելեց Սաֆրաստյանը:
