Պայթյունավտանգ իրավիճակն Արցախում և Փաշինյան-Ալիև հանդիպումը. ի՞նչ կտա բրյուսելյան այցը. ՏԵՍԱՆՅՈՒԹ

Նիկոլ Փաշինյանը հաջորդ շաբաթ Բրյուսել է մեկնում՝ Ալիևի հետ քննարկելու հայ-ադրբեջանական խաղաղության բանակցությունների մեկնարկին առնչվող հարցեր: Այսօր Կառավարության նիստին վարչապետը շեշտեց՝ Հայաստանը պատրաստ է խաղաղության բանակցությունների անհապաղ մեկնարկին:

Փաշինյան-Ալիև հանդիպումը նախատեսված է ապրիլի 6-ին: Այն լինելու է եռակողմ ձևաչափով՝ Եվրոպական խորհրդի նախագահ Շառլ Միշելի մասնակցությամբ: Առայժմ տեղկություններ չկան երկու երկրների ղեկավարների դեմ առ դեմ հանդիպման մասին, պաշտոնապես հրապարակված չէ նաև եռակողմ հանդիպման օրակարգը:

Փաշինյանը մինչ բրյուսելյան այցի մասին խոսելը ծավալուն անդրադարձավ Արցախում ստեղծված իրավիճակին: Վարչապետը մոտ կես ժամ քննադատում էր Բաքվի ագրեսիվ պահվածքը։ Հայաստանի ղեկավարը կարծում է՝ Ալիևն Արցախում լարված իրավիճակը ցանկանում է տեղափոխել հայ-ադրբեջանական սահման: Երևանը Բաքվին մեղադրում է ոչ միայն խաղաղության օրակարգից շեղվելու և շփման գծում իրավիճակը լարելու, այլ նաև արցախահայությանն ուղղված ֆիզիկական սպառնալիքների համար:

Նիկոլ Փաշինյանն այսօր վերահաստատել է նաև Երևանի այն դիրքորոշումը, որ խաղաղության բանակցություններին պատրաստ են Ադրբեջանի ներկայացրած հինգ առաջարկների և Հայաստանի կողմից արված լրացումների հիմքի վրա։ Քաղաքագետ Դավիթ Ստեփանյանի խոսքով՝ այս առաջարկներում կան տողատակեր, իսկ կողմերը պատրաստ չեն զիջումների գնալ:

Անդրադառնալով Բաքվից հնչող այն դիրքորոշումներին, թե հայկական կողմը չի կատարում նոյեմբերի 9-ի եռակողմ փաստաթղթի պահանջները, Փաշինյանը շեշտել է՝ Ադրբեջանը խեղաթյուրում է հայտարարության կետերը և հայկական կողմից պահանջում գործողություններ, որոնք չեն բխում այդ փաստաթղթի տրամաբանությունից: Հիշեցնենք՝ Ադրբեջանը ցանկանում է Հայաստանի տարածքով ճանապարհ ունենալ դեպի Նախիջևան, որը կունենա, այսպես ասած, «Լաչինի միջանցքի» կարգավիճակը:

Ի՞նչ արդյունքներ սպասել Փաշինյան-Ալիև հանդիպումից, երբ կողմերը տրամագծորեն տարբեր դիրքորոշում ունեն ստեղծված իրավիճակի վերաբերյալ: Քաղաքագետ Դավիթ Ստեփանյանի խոսքով՝ հավանականությունը մեծ է, որ Փաշինյանն ու Ալիևը համաձայնության չեն գա:

Իսկ ահա «Ազատ քաղաքացի» ՀԿ նախագահ Հովսեփ Խուրշուդյանը նշում է՝ եվրոպական կողմի պարտավորությունն է Ալիևին կառուցողական դաշտ տեղափոխելը:

Դավիթ Ատեփանյանը չի բացառում, որ Բրյուսելում Ալիևն Արցախում իրավիճակը կայունացնելու խոստումներ կտա, որոնք Բաքու վերադառնալուն պես մոռացության կմատնվեն: Հովսեփ Խուրշուդյանն էլ կարծում է՝ եթե Արևմուտքին տրված խոստումներն Ալիևը չկատարի, ապա լուրջ պատժամիջոցների կնեթարկվի։

Նիկոլ Փաշինյանն ու Իլհամ Ալիևը Բրյուսելի միջնորդությամբ բանակցելու են արդեն երրորդ անգամ: Առաջին հանդիպումը տեղի էր ունեցել նախորդ տարի դեկտեմբերի 14-ին: Կողմերը պայմանավորվածություն էին ձեռք բերել երկաթուղու շահագործման և հումանիտար խնդիրների կարգավորման շուրջ: Երկրորդ բանակցությունը Շառլ Միշելի և Էմանուել Մակրոնի միջնորդությամբ արդեն այս տարվա փետրվարի 4-ին էր՝ հեռավար ձևաչափով, որին հաջորդեց 8 հայ ռազմագերիների վերադարձը հայրենիք։ Ի՞նչ կտա երրորդ հանդիպումը՝ պարզ կդառնա մեկ շաբաթից։

Մանրամասները՝ տեսանյութում։

Նարեկ Կիրակոսյան