ՆԱՏՕ-ն սպառազինություն կմատակարարի Ուկրաինային՝ որքան անհրաժեշտ է. Ստոլտենբերգ

ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ ՆԱՏՕ-ի դաշնակիցները զենք կմատակարարեն Ուկրաինային ռուսական ագրեսիայից պաշտպանվելու համար այնքան ժամանակ, որքան անհրաժեշտ է։ Նման հայտարարությամբ նա հանդես է եկել Բրյուսելում կայացած մամուլի ասուլիսում։

«Մենք պետք է շարունակենք Ուկրաինային զենք մատակարարել այնքան ժամանակ, որքան անհրաժեշտ է: Դա չափազանց կարևոր է, քանի որ Ուկրաինան պատերազմ է մղում հանուն ազատության, ժողովրդավարության, մեր ընդհանուր արժեքների»,- ասել է Ստոլտենբերգը:

Նա հիշեցրել է, որ դաշինքը երկար տարիներ աջակցում էր Ուկրաինային, նույնիսկ նախքան ռազմական գործողությունները։ Ներխուժումից ի վեր դաշնակիցներն է՛լ ավելի մեծ օգնություն են ցուցաբերել՝ Ուկրաինային տրամադրելով զենք, մարդասիրական և ֆինանսական աջակցություն:

«Կա նաև լուրջ պարտավորություն ՆԱՏՕ-ի գագաթնաժողովից հետո, որը տեղի ունեցավ անցյալ շաբաթ, շարունակելու աջակցել Ուկրաինային»,- ընդգծել է Ստոլտենբերգը։

Միաժամանակ, նա ձեռնպահ է մնացել հստակ պատասխանից հարցին՝ արդյո՞ք այժմ Ուկրաինային հարձակողական սպառազինություն տրամադրելու անհրաժեշտություն կա։

«ՆԱՏՕ-ի դաշնակիցները երկար տարիներ աջակցել են ուկրաինական զինված ուժերին՝ տրամադրելով ժամանակակից տեխնիկա, տարբեր տեսակի զինատեսակներ, ինչպես նաև աջակցել ուկրաինական բանակի արդիականացմանը, ինչն օգնեց այն ավելի ուժեղ և պատրաստված դարձնել, քան երբևէ եղել է։ Բայց, իհարկե, ամենից առաջ սա ուկրաինացի զինվորների՝ համազգեստով տղամարդկանց և կանանց խիզախությունն է, ովքեր կարողացան դիմակայել ռուսական ուժերին»,- նշել է ՆԱՏՕ-ի գլխավոր քարտուղարը՝ հավելելով, որ Ուկրաինայի զինված ուժերի այս խիզախությունը տպավորվիչ է և ոգեշնչող ամբողջ աշխարհի համար:

Տաթև Ֆռանգյան