Պետդումա է ներկայացվել ռուսերենին տիրապետողներին հայրենակից ճանաչելու մասին օրենքի նախագիծ

Պետդումայի ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահի առաջին տեղակալ Կոնստանտին Զատուլինը («Եդինայա Ռոսիա» խմբակցություն) օրինագիծ է ներկայացրել, որով առաջարկում է հայրենակից ճանաչել բոլոր նրանց, ովքեր տիրապետում են ռուսերենին։ Փաստաթուղթը երկուշաբթի տեղադրվել է Դումայի էլեկտրոնային տվյալների բազայում, գրում է ՏԱՍՍ-ը։

Բացատրական փաստաթղթերում նշվում է, որ «օրինագիծը վերացնում է «հայրենակից» հիմնական հասկացության անհիմն լայն մեկնաբանության թերությունները»։ Մասնավորապես, առաջարկվում է հայրենակից ճանաչել այն անձանց, ովքեր «ռուսերեն խոսում են և պատկանում են պատմականորեն Ռուսաստանի տարածքում բնակվող ժողովուրդներին», ինչպես նաև այն անձանց, որոնց անմիջական նախնիները ծնվել կամ ապրել են Ռուսաստանի Դաշնությունում»:

«Սրա հետ մեկտեղ, հաշվի է առնվում, որ ԽՍՀՄ փլուզումից հետո անցած 30 տարիների ընթացքում մեծացել է հայրենակիցների նոր սերունդ, որը չի ունեցել ԽՍՀՄ քաղաքացիություն։ Այս առումով «Հայրենակից» հասկացության սահմանումից հանվել է ԽՍՀՄ քաղաքացիության հետ կապը»,- ասվում է կից նյութերում։

Օրինագծով առաջարկվում է նաև հստակեցնել Ռուսաստանի տարածքում պատմականորեն ապրող ժողովուրդների ցանկը։ Մասնավորապես, ցուցակում ընդգրկված են բելառուս և ուկրաինացի ժողովուրդների ներկայացուցիչները, բնիկ փոքրաթիվ ժողովուրդները։

Տաթև Ֆռանգյան