Հայաստանում այս պահից սկսած հաստատվելու է օրինականության, հավասարության, եղբայրության և ազգային միասնականության մթնոլորտ. Նիկոլ Փաշինյան

Հանրապետության հրապարակում մեկնարկած հաղթական հանրահավաքի ելույթում Նիկոլ Փաշինյանն ասաց.  «Երեկ առավոտյան «Մարիոթ» հյուրանոցում տեղի ունեցավ իմ ու Սերժ Սարգսյանի արդեն հայտնի հանդիպումը, և նա հանդիպման կեսից թողեց, հեռացավ: Այդ պահից ինձ համար հասկանալի էր, որ նա այլևս հեռացել է նաև վարչապետի պաշտոնից: Երեկ, երբ Ազգային անվտանգության ծառայության մի խումբ աշխատողներ ինձ առևանգեցին Արցախի պողոտա-Էրեբունի խաչմերուկից և տանում էին հույժ գաղտնի պայմաններով Սևանի ոստիկանության բաժին, ես նրանց հետ հումորներ էի անում, ու նրանք չէին հասկանում, թե ինչու եմ այդպես վարվում:  Ես նրանց բացատրում էի, ասում էի՝ տղերք, Սերժի իշխանությունն այլևս չկա, դուք չեք հասկանում, որ այս պահից Հայաստանի Հանրապետությունում կա նոր իշխանություն և այդ իշխանության անունն է Հայաստանի Հանրապետության ժողովուրդ»:

«Ինձ պահում էին կատարյալ մեկուսացված պայմաններում,- շարունակեց Փաշինյանը,- բայց մի իքս պահից, երբ իմ խուց էին գալիս բարձրաստիճան պաշտոնյաներ, ես հասկացա, որ մեր հռչակած թավշյա, ոչ բռնի, ժողովրդական հեղափոխությունը հաղթել է: Այսօր առավոտյան ինձ առաջարկում էին համաձայնվել, որ Սերժը հրաժարական տա հոկտեմբերին: 2 ժամից ինձ առաջարկում էին, որ Սարգսյանը հրաժարական տա 1 ամսից: Ավելի ուշ ինձ առաջարկում էին, որ Սերժ Սարգսյանը հրաժարական տա ապրիլի 25-ին: Լսեցի դրանք ու արեցի իմը՝ ձեր անունից ասացի. նա պետք է հրաժարական տա 2 ժամվա ընթացքում, ու Սերժ Սարգսյանը հրաժարական տվեց: Ուզում եմ, սակայն, տոնելով տոնենք այս իրադարձությունը, որ ժողովրդական ոչ բռնի թավշյա հեղափոխութունը տարել է իր կարևոր հաղթանակը, բայց ուզում եմ հիշեցնել, որ մեր օրակարգում ոչ թե 1, այլ մի քանի հարց էր դրված: Քայլ 1-ին. Սարգսյանը հրաժարական է տալիս, 2-րդ. ԱԺ-ն վարչապետ է նշանակում ժողովրդի թեկնածուին: 7 օրում վարչապետի նշանակումից հետո ձևավորվում է ժամանակավոր կառավարություն, որից հետո պետք է տեղի ունենան ԱԺ արտահերթ ընտրություններ: Քանի որ Սարգսյանն արդեն հեռացած է, պատրաստվում ենք չորեքշաբթի՝ ժամը 11:00-ին «Մարիոթում» շարունակել բանակցություններն իշխանության անցնցում փոխանցման օրակարգի շուրջ՝ վարչապետի ժամանակավոր պաշտոնակատար Կարեն Կարապետյանի հետ: Ես ուզում եմ, որ մենք միանշանակ և աներկբա արձանագրենք՝ մեր հռչակած թավշյա, ոչ բռնի, ժողովրդական հեղափոխությունը չի կարող կիսատ մնալ, այն պետք է շարունակվի մինչև վերջ, և ես հույս ունեմ, որ դուք բոլորդ կանգնած եք հանուն այդ վերջնական հաղթանակի»:

Ապա ընդդիմադիր գործիչը նշեց, որ եթե ՀՀԿ-ն ու Սերժ Սարգսյանը հույս ունեն, որ շարունակելու են ստվերային կառավարում իրականացնել, ապա հորդորում է բոլորին՝ րոպե առաջ մոռանալ այդ միտքը. «Ժողովուրդը հաղթել է, ու այդ հաղթանակը պետք է ճանաչվի անվերապահորեն, առանց նախապայմանների»:

Փաշինյանը անդրադառնալով երկար տարիներ երկրում ստեղծված ատելության մթնոլորտին, հայտարարեց. «Ուզում եմ, որ միասին արձանագրենք՝ Հայաստանում ատելության մթնոլորտի էջը փակված է: Ուզում եմ դիմել բոլոր նրանց, ովքեր մտածում են, թե այս հեղափոխությունը թշնամական է իրենց նկատմամբ: Նրանք, ովքեր ճամպրուկներն են հավաքում կամ մտածում են հավաքելու մասին՝ քաղաքացիներ, գործարարներ, մտածում են, թե սկսվելու է վրեժխնդրություն ու վենդետա, և ուզում են կապիտալը հանել ՀՀ-ից, կասեմ հետևյալը. մի՛ արեք այդ բանը, որովհետև վենդետա չի լինելու: Հայաստանի Հանրապետությունում այս պահից սկսած հաստատվելու է օրինականության, հավասարության, եղբայրության և ազգային միասնականության մթնոլորտ»:

Ապա դիմելով  Լեռնային Ղարաբաղի Հանրապետության իշխանություններին շնորհակալություն հայտնեց, որ նրանք, ի հեճուկս տարածվող խուճապային լուրերի, ստահոդ լուրերի, այս իրավիճակում պահպանեցին կատարյալ զսպվածություն և չեզոքություն և չտրվեցին գայթակղություններին, սադրանքներին. «Եկեք ծափահարենք Լեռնային Ղարաբաղի Հանրապետությանը»:

Հաջորդիվ նշեց, որ  վարչապետի հիմա արդեն ժամանակավոր պաշտոնակատարի հետ ձեռք են բերել պայմանավորվածություն, որ թավշյա հեղափոխության ձերբակալվածները պետք է անհապաղ ազատ արձակվեն: Փաշինյանը շեշտեց, որ հաջորդ փուլում բոլոր քաղբանտարկյալները պետք է ազատ արձակվեն

Փաշինյանն իր ելույթն ավարտեց՝ նշելով, որ սա ողնուծուծով, զտարյուն, մաքուր հայկական թավշյա հեղափոխություն է, և որևէ այլ մեկնաբանություն չի կարող լինել. «Եվ ես ուրախ եմ, որ աշխարհի տարբեր երկրներ ի գիտություն են ընդունել մեր այս ուղերձը, և հենց այդպես էլ ընկալում են իրավիճակը: Դուք բոլորդ այս տոնը կերտել եք սեփական ձեռքերով, և ես ուզում եմ ասել այն, ինչ ասացի բանտից դուրս գալուց և հրապարակ հասնելուց հետո` Հայաստանի Հանրապետության ժողովո՛ւրդ, քո ցավը տանեմ»: