18.08.2026 | 13:59
Դոնալդ Թրամփի վարկանիշը հասել է 33%-ի՝ նվազագույնը պաշտոնավարման երկու ժամկետի ընթացքում
Ասում եմ՝ ԼՂ բոլոր իրավունքները․ Միրզոյանը հրաժարվեց խոսել ԼՂ ինքնորոշման իրավունքի մասին. ՏԵՍԱՆՅՈւԹ
Քաղաքականություն
23.03.2022 | 19:01
ԱԺ-կառավարություն հարց ու պատասխանի ժամանակ «Հայաստան» խմբակցության պատգամավոր Լիլիթ Գալստյանը դիմեց արտաքին գործերի նախարար Արարատ Միրզոյանին։
«2021 թվականի հունիսի 17-ին Արտաքին գործերի նախարարությունը, անդրադառնալով Շուշիի հռչակագրին, տարածել է մի հայտարարություն, որտեղ հետևյալ հաստատումները կան. «Թուրքիայի և Ադրբեջանի նախագահների հրապարակային պայմանավորվածությունները պարունակում են ոչ միայն ցեղասպան սպառնալիքներ տարածաշրջանում հայ ժողովրդի նկատմամբ, այլ նաև լուրջ մարտահրավեր են միջազգային և տարածաշրջանային խաղաղությամբ և անվտանգությամբ շահագրգիռ բոլոր երկրների համար, ինչն ընդգծում է նշված բոլոր երկրների կողմից սերտ համագործակցության անհրաժեշտությունը։ Արցախի ժողովրդի դեմ ագրեսիայի և ուժի կիրառման արդյունքում ձեռքբերված իրողությունները չեն կարող տևական խաղաղության հիմք դառնալ, այնպես, ինչպես Շուշիում թուրք-ադրբեջանական տարբեր մտացածին նախաձեռնությունները չեն կարող հայկական այդ մշակութային կենտրոնն օտարել Արցախից և հայ ժողովրդից»։
Պարոն Միրզոյան, հետագայում ձեր պաշտոնական հռետորաբանությունը կարծես թե ամբողջովին փոխվել է։ Եվ դուք այսօր էլ բառի խորը գիտակցությամբ հայտարարեցիք, որ ադրբեջանական հինգ առաջարկներում Հայաստանի համար և ձեզ համար անընդունելի ոչինչ չկա։ Ձեզ համար, ինչպես «Արմենպրեսի» հետ հարցազրույցում եք հաստատել, ԼՂ հիմնախնդիրը տարածքային հարց չէ, այլ իրավունքների։ Դուք գործածում եք արցախահայության իրավունքներ և ազատություններ արտահայտությունը՝ առանց հստակեցնելու ինքնորոշման իրավունքը։ Ի՞նչ դիրքորոշում է փոխանցվել Ադրբեջանին և արդյոք դուք պատրաստվում եք բանակցային գործընթացում ներառել ինքնորոշման իրավունքը։ Եվ երբ դիմել եք ԵԱՀԿ-ին խաղաղության պայմանագրի շուրջ բանակցություններ կազմակերպելու առաջարկով, արդյոք այդ առաջարկությունների մեջ ներառվելու է թուրքական ագրեսիային գնահատականը, ինչպես նաև վարձակնների ներգրաման փաստը»,- նշեց Գալստյանը:
Արարատ Միրզոյանը պատասխանեց․ «Ես խնդրում եմ ձեզ՝ որպես հայ մարդը հայ մարդուն, երբ մեջբերում եք անում, արեք ամբողջ մեջբերումը։ Ես վստահ եմ, որ քաջ գիտակցում եք, որ այդ մեջբերումը, որը մեջբերեցիք, անքակտելիորեն կապված է դրան հաջորդող նախադասության հետ։ Եվ ամբողջական միտքը հետևյալն է՝ Ադրբեջանի հինգ առաջարկներում մեզ համար, ըստ էության, անընդունելի ոչինչ չկա, բայց այլ բան, որ այդ առաջարկները չեն հասցեագրում խնդիրների ամբողջական օրակարգը։ Եվ այդ օրակարգն ամբողջացնելու համար մենք հանդես ենք եկել համալրող մեր առաջարկներով։ Երբ մենք ասում ենք՝ իրավունքներ, նկատի ունենք բոլոր իրավունքները… Ի վերջո մենք կարող ենք հրապարակել փաստաթուղթը, իմ հարցազրույցի հարցերը հանեք, մնացածը համարյա այդ փաստաթուղթն է»։
Արարատ Միրզոյանը հավելեց․ «Եթե այդ մրցավազքն սկսվի, ես ձեզ բոլորիդ կհաղթեմ ճոռոմ ու ռազմահայրենասիրական, գեղեցիկ բառեր ասելու մրցույթում։ Ես գիտեմ ավելի գեղեցիկ ու հայրենասիրական բառեր, քան դուք երբևէ կյանքում լսել եք։ Բայց, ի տարբերություն ձեզ, ես մտածում եմ, որ իմ բառին կարող է հետևի մի բան, կամ չհետևի մի բան։ Վատ չէր լինի, որ դուք էլ այդ պատասխանատվությամբ վերաբերվեիք»։
Մանրամասները՝ տեսանյութում:
