«Մեկը գալիս է պաշտոնի, ցեղին հետը բերում է»․ ինստիտուտի տնօրենի թեկնածուի թեժ ընտրություններ՝ ԳԱԱ-ում․ ՏԵՍԱՆՅՈՒԹ

Գիտությունների ազգային ակադեմիայի Փիլիսոփայության, սոցիոլոգիայի և իրավունքի ինստիտուտում մարտի 22-ին մթնոլորտը թեժ էր: Հերթական ժողովի ժամանակ քննարկվում էր տնօրենի թափուր տեղի համար Հայագիտության և հասարակական գիտությունների բաժանմունքի բյուրոյի կողմից այլընտրանքային թեկնածուի` Էմիլ Օրդուխանյանի առաջադրումը: Փակ գաղտնի քվեարկության արդյունքներով ժողովի 32 մասնակիցներից միայն 10-ն էր կողմ Օրդուխանյանի առաջադրմանը, 20-ը դեմ էր, 2 թվեաթերթիկ անվավեր էր։

Տնօրենի պաշտոնի մյուս հավակնորդը ինստիտուտի տնօրենի ժամանակավոր պաշտոնակատար Անահիտ Ջիջյանն է: Նրա թեկնածությունը հաստատվել էր ավելի վաղ նույն ընթացակարգով անցկացված ժողովի ընթացքում: Տնօրենի վերջնական ընտրությունը պետք է կատարի ակադեմիայի նախագահությունը: Իսկ մինչ այդ կրքերը չեն հանդարտվում: Հայագիտության և հասարակական գիտությունների բաժանմունքի ակադեմիկոս-քարտուղար Յուրի Սուվարյանի պնդմամբ` ինստիտուտի տնօրենի ժամանակավոր պաշտոնակատարը Անահիտ Ջիջյանը, որն այդ պաշտոնը զբաղեցնում է այս տարվա փետրվարից, խախտել է Հայաստանի կառավարության` Գիտական և գիտատեխնիկական գործունեության բազային ֆինանսավորման կարգը:

«Բարձրացված աշխատավարձ կարող են ստանալ այն գիտաշխատողները, որոնք նախորդ տարի անցել են ատեստավորում։ Տնօրենի պաշտոնակատարը ավագ, կրտսեր գիտաշխատողների, լաբորանտների է բարձր աշխատավարձ նշանակել, որոնք ատեստավորում չեն անցել»,-ասում է Սուվարյանը։

Անահիտ Ջիջյանը, սակայն, պնդում է` կառավարության որոշման կետը, որն առնչվում է գիտական կադրերի որակավորմանը, վերաբերում է կառույցներին, ոչ թե անձերին: Ակադեմիայի որոշ անդամներ նշում են, որ տնօրենի ժամանակավոր պաշտոնակատարը իր պաշտոնը զբաղեցնելուց օրեր անց անմիջապես աշխատանքի է ընդունել ամուսնուն և որդուն: Բացի այդ, նրանց պնդմամբ, ինստիտուտի աշխատակազմից ինը հոգի երեք ընտանիքի ներկայացուցիչ են: Եվ չնայած հավաստիացումներին, թե Անահիտ Ջիջյանի ամուսինն ինստիտուտում ավագ գիտաշխատող է, իսկ որդին` կրտսեր գիտաշխատող, և այդպիսով որևէ օրենք չի խախտվում, ակադեմիայի անդամներից շատերը պնդում են, որ դա հանգեցնում է ընտրությունների ժամանակ շահերի բախմանը: Առհասարակ, ինստիտուտի աշխատակիցներից ոմանք այն համոզման են, որ կառույցը արդեն հնացել է և երիտասարդ ղեկավարի նշանակումը կարող է փրկել իրավիճակը։

Մանրամասները՝ տեսանյութում։

Աննա Բաբաջանյան