21.08.2026 | 15:19
«Մարտին սթար»-ի վանիլային պաղպաղակի արտադրության կասեցումը վերացվել է
ԱՄՆ Կոնգրեսի Ներկայացուցիչների պալատը հավանություն է տվել Ռուսաստանի և Բելառուսի հետ նորմալ առևտրային հարաբերությունները դադարեցնելու օրինագծին
Քաղաքականություն
18.03.2022 | 13:40
ԱՄՆ Կոնգրեսի Ներկայացուցիչների պալատը հավանություն է տվել Ռուսաստանի և Բելառուսի հետ նորմալ առևտրային հարաբերությունները դադարեցնելու օրինագծին, գրում է VOA-ն։
Փաստաթղթին կողմ է քվեարկել 424 օրենսդիր, դեմ՝ ութը։ Այժմ օրինագիծը փոխանցվում Սենատ՝ քննարկման:
Նորմալ առևտրային հարաբերությունների կասեցումը նշանակում է, որ ռուսական և բելառուսական ապրանքների ներմուծումները կկորցնեն ամերիկյան շուկայում առավել բարենպաստ դիրքերը։ Սա նախագահ Ջո Բայդենի վարչակազմին թույլ կտա ավելի բարձր տուրքեր սահմանել ռուսական և բելառուսական ապրանքների համար, քան Առևտրի համաշխարհային կազմակերպության (ԱՀԿ) անդամ մյուս երկրների պարագայում։
Բացի այդ, նախաձեռնությունը առևտրային բանակցություններում ԱՄՆ ներկայացուցչից պահանջում է ձգտել՝ սառեցնել Ռուսաստանի մասնակցությունը Առևտրի համաշխարհային կազմակերպությանը և կասեցնել Բելառուսի մուտքն այս կազմակերպություն:
Փաստաթուղթն ուժի մեջ կմնա մինչև 2024 թվականի հունվարի 1-ը։ ԱՄՆ նախագահը հնարավորություն կունենա վերականգնել նորմալ առևտրային հարաբերությունները Ռուսաստանի և Բելառուսի հետ, եթե «այդ երկրները դադարեցնեն իրենց ագրեսիվ գործողությունները Ուկրաինայի դեմ, ինչպես նաև որոշ այլ պայմաններով», ասվում է օրենքի պարզաբանման մեջ։
Տաթև Ֆռանգյան
