Զինվորին խոշտանգելու մեջ մեղադրվող հրամանատարի կոչումը բարձրացվել է մինչ միջադեպը

Հունվարի 31-ին բանակ զորակոչված և հաջորդ օրը զորամասը լքած Վլե Ֆերոյանի և Կապանի N զորամասի ուսումնական մարտկոցի հրամանատար Արմեն Ավագյանի միջև ի՞նչ միջադեպ է տեղի ունեցել և արդյո՞ք հրամանատարն իսկապես հարվածել և նվաստացրել է նորակոչիկին։ Այս հարցերի պատասխանները ստանալու համար Factor.am-ը գրավոր հարցում էր ուղարկել Պաշտպանության նախարարություն։ Պաշտպանական գերատեսչությունից միայն նշել են, որ հարուցված է քրեական գործ, իսկ ՔԿ ԶՔԳՎ 9-րդ կայազորային քննչական բաժնում կատարվում է նախաքննություն։

Վլե Ֆերոյանի տատը՝ Ռուզաննա Ֆերոյանը, Factor.TV-ի հետ ավելի վաղ կայացած զրույցում ասել էր, որ հրամանատար Արմեն Ավագյանի զինվորական կոչումը միջադեպից մի քանի օր անց բարձրացվել է։ ՊՆ-ից նաև խնդրել էինք հայտնել՝ այդ տեղեկությունն իրականությանը համապատասխանո՞ւմ է, թե՞ ոչ։

«Ա․ Ավագյանին  հերթական զինվորական կոչումը շնորհվել է «Զինվորական ծառայության և զինծառայողի կարգավիճակի մասին» ՀՀ օրենքի 15-րդ հոդվածի 1-ին մասի համաձայն՝ ՀՀ պաշտպանության նախարարի 2022 թվականի հունվարի 27-ի համապատասխան հրամանով՝ մինչև տեղի ունեցած միջադեպը»,- մանրամասնել են ՊՆ-ից։

Հիշեցնենք՝ փետրվարի սկզբին նորակոչիկ Վլե Ֆերոյանի հարազատներն ահազանգել էին, որ տղան զորամասից անհետացել է և որևէ տեղեկություն չունեն։ Վլեն զորակոչվելու հենց հաջորդ օրը զանգահարել էր տուն ու ասել, որ իրեն ճնշում են, ծեծում, ստիպում սանհանգույց մաքրել։ Վլե Ֆերոյանի տատը՝ Ռուզաննա Ֆերոյանը, ասել էր, որ միջադեպի անմիջական մասնակիցը ուսումնական մարտկոցի հրամանատար  Արմեն Ավագյանն է։ Վլեն ծառայում էր Կապանի N զորամասում, հիմա կրկին ծառայության մեջ է, սակայն մեկ այլ զորամասում։

Արփի Հակոբյան