Քաղաքական որոշման, այլ ոչ թե ցանկության հարց է․ Գ․ Մելիքյանը Սերժ Սարգսյանի՝ վարչապետ լինելու մասին

Կառավարության ծրագրում ներկայացված 5 տոկոս աճի ցուցանիշը բավականին իրատեսական է, աշխատանքների՝ առավել արդյունավետ կազմակերպման դեպքում կարող է նույնիսկ ավելի բարձր ցուցանիշ լինել։ Այս մասին Factor.am-ի հետ զրույցում ասաց ԱԺ ՀՀԿ խմբակցության քարտուղար Գագիկ Մելիքյանը։

Մեր դիտարկմանը, թե նախորդ տարի ընդամենը 0,2 տոկոս աճ ապահոված իշխող ուժն ինչպե՞ս է ապահովելու 5 տոկոս աճի ցուցանիշ, Մելիքյանը պատասխանեց, որ նման ցուցանիշը ստացվել է մի քանի պատճառով:

«Հիմնականում թվերի ճշգրտում, նախորդ 10 ամսվա տնտեսական աճի ցուցանիշը կտրուկ նվազեց ճշտումների հետևանքով, դա հետևանք էր նաև գլոբալ աշխարհում տեղի ունեցող մարտահրավերների՝ հատկապես մեր դաշնակից ՌԴ-ի նկատմամբ պատժամիջոցների իրականացման, որոնք բացասական հետևանքներ ունեցան նաև մեր Հանրապետության տնտեսական աճի ցուցանիշի ապահովման համար»,-ասաց նա։ Ինչ վերաբերում է ՀՀԿ խոսնակ Էդուարդ Շարմազանովի ելույթի այն հատվածին, որ անկախ նրանից, թե ով լինի վարչապետը 2018-ից հետո, միևնույն է, ընդդիմությունը գործ է ունենալու Սերժ Սարգսյանի հետ, քանի որ նա է ՀՀԿ նախագահը, Մելիքյանն ասաց․ «Կարծում եմ՝ պատասխանը լիարժեք էր, Սերժ Սարգսյանը մեր կուսակցության նախագահն է, մեր կուսակցությունը ստացել է ժողովրդի քվեն իշխանություն ձևավորելու համար, և առաջիկա հինգ տարիների ընթացքում նախագահ Սարգսյանի գլխավորությամբ իրականացնելու է երկրի կառավարումը»։

Ճշտող հարցին՝ կցանկանա՞ վարչապետի պաշտոնում Սարգսյանին տեսնել, Մելիքյանն ասաց․ «Կարծում եմ՝ դա քաղաքական որոշման հետևանք պետք է լինի, անձերի ցանկությունները կարևոր չեն»։

Առավել մանրամասն՝ տեսանյութում։

Սեդա Ղուկասյան