Քաղաքականություն
14.03.2022 | 15:46
Թուրքիայի քրդամետ Ժողովուրդների դեմոկրատական կուսակցության հայազգի պատգամավոր Կարո Փայլանը ողջունել է ՀՀ ԱԳ նախարար Արարատ Միրզոյանի և Թուրքիայի ԱԳ նախարար Մևլութ Չավուշօղլուի հանդիպումը Անթալիայի դիվանագիտական ֆորումի շրջանակում, գրում է Bianet-ը։
Փալյանն իր թվիթերյան էջում հայերեն, անգլերեն և թուրքերեն գրառում է կատարել՝ հանդիպումը որակելով հուսադրող։
«Թուրքիայի և Հայաստանի արտաքին գործերի նախարարներ Մևլութ Չավուշօղլուն և Արարատ Միրզոյանը հանդիպել են Անթալիայի դիվանագիտական ֆորումում՝ երկու երկրների միջև հարաբերությունների կարգավորման գործընթացում բարձր մակարդակի առաջին հանդիպմանը։ Հուսադրող պահ»,- գրել է հայազգի պատգամավորը։
Նշենք, որ երկու երկրների ԱԳ նախարարների հանդիպումը տեղի է ունեցել մարտի 12-ին։ Երևանն ու Անկարան հարաբերությունների կարգավորման գործընթացի շրջանակում նաև հատուկ բանագնացներ են նշանակել։ Ներկայացուցիչների առաջին հանդիպումը տեղի է ունեցել հունվարի 14-ին Մոսկվայում, երկրորդ հանդիպումը՝ փետրվարի 24-ին Վիեննայում։
Էմմա Չոբանյան
