28.04.2025 | 22:57
Բաքուն հայտնում է, թե իր պահանջով Ինտերպոլը Մակրոնի անվտանգության նախկին ղեկավարի նկատմամբ հետախուզում է հայտարարել
Սասուն Խաչատրյանը «տարակուսած է» Արթուր Դավթյանի պատասխանից
Հասարակություն
13.03.2022 | 23:26
Սասուն Խաչատրյանի ղեկավարած Հակակոռուպցիոն կոմիտեն պատասխանել է Գլխավոր դատախազ Արթուր Դավթյանի այն տեսակետին, թե «տարակուսած է», որ Հովիկ Աբրահամյանի՝ Մոնումենտում գտնվող առանձնատան վրայից կալանքը հանվել է, և տունը վաճառվել է:
«Առայժմ մենք էլ ենք տարակուսած, որովհետև դա մեզ հայտնի չի եղել, և մենք հիմա ձեռնարկում ենք անհրաժեշտ բոլոր միջոցները, որպեսզի դրա բոլոր հանգամանքները պարզենք, իսկ մեղավորները դրա համար կենթարկվեն պատասխանատվության»,- ասել էր գլխավոր դատախազը:
Հակակոռուպցիոն կոմիտեն էլ իր հերթին է տարակուսած Արթուր Դավթյանի պատասխանով:
«ՀՀ քրեական դատավարության օրենսգրքի 427-րդ հոդվածի 1-ին մասի համաձայն`«Առաջին ատյանի դատարանի` գործն ըստ էության չլուծող դատական ակտն ուժի մեջ է մտնում կայացման պահից»: Նույն հոդվածի 2-րդ մասը սահմանում է, որ օրինական ուժի մեջ մտած դատական որոշումը կատարման է հանձնվում որոշումը կայացրած դատարանի կողմից ոչ ուշ, քան 3 օր հետո:
Ընդ որում, վերը նշված որոշումների բողոքարկումը չի կասեցնում դրանց կատարումը: Հետևաբար ՀՀ հակակոռուպցիոն կոմիտեի քննիչը պարտավոր էր առաջնորդվել բացառապես օրենքով և կատարել դատարանի որոշումը։ Ի դեպ, օրինական ուժի մեջ մտած դատական ակտը դիտավորությամբ չկատարելը, համաձայն ՀՀ քրեական օրենսգրքի 353-րդ հոդվածի, համարվում է հանցագործություն: Այսպիսով, առնվազն տարակուսելի է, որ գլխավոր դատախազը, քաջատեղյակ լինելով վերը նշված քրեադատավարական նորմերին, նման կերպ է արձագանքել:
Հակակոռուպցիոն կոմիտեն գործում է միայն օրենքով իրեն վերապահված լիազորությունների շրջանակներում, իսկ օրենքից տեղյակ կամ անտեղյակ սուբյեկտների անհիմն, ականջահաճո արտահայտությունները չեն կարող ազդեցություն ունենալ օրինականության սկզբունքին անշեղ հետևելու կոմիտեի կամքի վրա և ստվերել նրա գործունեությունը»,- ասված է տարածված հաղորդագրությունում:
Factor.am-ն ավելի վաղ հայտնել էր, որ Հովիկ Աբրահամյանի ընտանիքը 5 մլն դոլարով վաճառել է ԱԺ շենքի նմանությամբ կառուցված և իրենց պատկանող առանձնատունը, որի վրա կալանք կար դրված: Կալանքը հանվել էր գործարքից մի քանի օր առաջ: Առանձնատան գնորդը վերջերս «Գոլդեն Փելես» հյուրանոցը գնած Նարեկ Նալբանդյանի ընտանիքն է:
Նարեկ Կիրակոսյան
