12.12.2025 | 23:31
Պուտինի օգնականը չի բացառել պատերազմի ավարտից հետո Դոնբասի ապառազմականացումը
5 թե՞ 3.2 տոկոս տնտեսական աճ. կառավարության ո՞ր խոստմանը հավատա քաղաքացին
Քաղաքականություն
21.06.2017 | 18:21
Չնայած կառավարության ծրագրում նախատեսված է առաջիկա 5 տարում՝ 2017-22 թվականներին ապահովել 5 տոկոս տնտեսական աճ, այս տարվա բյուջեում կառավարությունը խոստանում է ընդամենը 3.2 տոկոս աճ ապահովել:
Տնտեսական զարգացման և ներդրումների նախարար Սուրեն Կարայանից factor.am-ը հետաքրքրվեց, թե կառավարությունն ի՞նքն էլ չի հավատում իր խոստմանը, թե բյուջեում գրել է 3.2 տոկոս աճ:
«Կառավարության ծրագրում նշված է, որ միջինը կլինի 5 տոկոս առաջիկա 5 տարվա ընթացքում, այս տարվա ցուցանիշը 3.2 տոկոս, սահմանվել է անցյալ տարի, երբ կառավարությունը բերեց բյուջեի նախագիծը»,- ի պատասխան ասաց նախարարը:
Նշենք, սակայն, որ այս տարվա բյուջեն նույն Կարեն Կարապետյանի կառավարությունն է ներկայացրել խորհրդարան: Իսկ այս տարի որևէ փոփոխություն չի եղել դրանում: Դիտարկմանը՝ ասել է թե՝ այս տարի չի լինի 5 տոկոս տնտեսական աճ, Կարայանն ասաց. «Արդյունքները, որ արձանագրվել են, հիմք են տալիս ենթադրելու, որ այնուամենայնիվ կլինի: Ոչ մի հիմք չկա ենթադրելու, որ վատ է լինելու»:
ՀՀԿ-ական նախարար Սուրեն Կարայանին հիշեցրինք, որ 2013 -ի ընտրություններում ՀՀԿ-ն ի դեմս Սերժ Սարգսյանի խոստանում էր 7 տոկոս տնտեսական աճ, որն այդպես էլ իրականություն չդարձավ՝ հարցնելով, թե ներկա՝ 5 տոկոս խոստումը իրատեսակա՞ն է: «Այո, իմ կարծիքով իրատեսական է, և մենք վերցրել ենք այդ ցուցանիշը, որ դա լինելու է նվազագույնը»,- ասաց նախարարը:
Մանրամասները դիտեք factor.am-ի հետ տնտեսական զարգացման և ներդրումների նախարար Սուրեն Կարայանի հարցազրույցում:
Մարինե Խառատյան
