Բևեռացումը մեր տունը քանդում է, ես կարևորում եմ «մենքը». Կարինե Ջանջուղազյան. ՏԵՍԱՆՅՈՒԹ

«Սոս Սարգսյանն ասում էր` Կարինե, այն, ինչ կատարվում է մեզ հետ, մեր մասին է, բայց ես վերջերս մտածում եմ, որ այն, ինչ կատարվում է մեզ հետ, բոլորովին էլ մեր մասին չէ: Եկանք-հասանք այս օրին ինքնախաբեությամբ, ժամանակը ճիշտ չգնահատելով, չօգտագործելով մեր հոգևոր ռեսուրսները»,- Factor TV-ի հետ զրույցում նման տեսակետ է հայտնում ՀՀ վաստակավոր արտիստ Կարինե Ջանջուղազյանը:

Նրա խոսքով` այսօր Հայաստանում հակահերոսները շատացել են, ցավոք, դա իր արտահայտությունն է ունենում նաև արվեստում, և երիտասարդները ձգտում են նմանվել այդ հակահերոսներին: Մինչդեռ, դերասանուհու համոզմամբ, մեր օրերի հերոսը գլուխը կախ իր գործն անողն է, իր հողին տեր կանգնողը.

«Այսօր բևեռացումը մեր տունը քանդում է: Ես կարևորում եմ «մենքը»: Ատելություն սերմանողները, իշխանավորները երամ-երամ կգան ու կգնան, բայց «մենքը» կմնա: Այսօր մեր հասարակությունը շատ մոլորված է, հիվանդ, չգիտի` ուր գնա: Հունձքը շատ է, մշակները` քիչ. մշակներին խեղդել են»:

Կարինե Ջանջուղազյանը շեշտում է` ամեն դեպքում, ժամանակը ցույց է տալիս` ով է «որոմը», ով` «հասկը», պարզապես հարկավոր է դա տեսնել. «Որքան լացեցինք, իրար կերանք, մեղադրեցինք` բավ է. ժամանակն է արարելու, ստեղծագործելու: Մեր տունը ռմբակոծվել է, ոտքի´ կանգնեք, կառուցե´ք, պահանջատե´ր եղեք: Եկեք ազգովի ապաշխարենք. սթափվել է պետք սխալ ընթացքից, եկեք այլևս ինքներս մեզ չխաբենք: Հա´յ ժողովուրդ, քո արվեստը, քո երգը, կանչը, պոեզիան ողբ է, լաց ու կոծ: Հերիք է, եկեք կյանքի, ապրելու մասին խոսենք»:

Դերասանուհին, անդրադառնալով ռուս-ուկրաինական պատերազմին, նկատում է` այսօր աշխարհում եղբայրը եղբոր դեմ է ելել. «Դա ինձ սարսափեցնում է, ի՞նչ են կիսում իրար հետ` չեմ հասկանում, մշակե՛ք ձեր հողը, ինչո՞ւ եք իրար ուտում, անմեղ մարդիկ են զոհվում: Դուք ձեր այգին մշակե՞լ եք, որ ուրիշի բակի դեմ կռիվ եք տալիս: Զարհուրելի ժամանակաշրջան ենք ապրում»:

Մանրամասները` տեսանյութում:

Աննա Բաբաջանյան