17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
Ուկրաինայի 8 քաղաքացի դիմել է ՀՀ-ում ապաստան ստանալու հայցով
Հասարակություն
11.03.2022 | 20:55
Ռուս-ուկրաինական պատերազմի մեկնարկից մինչ օրս Հայաստանի Հանրապետության Միգրացիոն ծառայությունը Ուկրաինայի քաղաքացիներից ապաստանի 8 հայց է ստացել։ Ինչպես Factor.am-ի հետ զրույցում մանրամասնեց Միգրացիոն ծառայության հանրային կապերի պատասխանատու Նելլի Դավթյանը՝ նրանց դիմումները կքննվեն առաջիկա 3 ամսվա ընթացքում։
«Ցանկացած օտարերկյա քաղաքացի կարող է ապաստանի հայց ներկայացնել, սակայն փախստականի կարգավիճակ կարող են ակնկալել այն մարդիկ, որոնք իրենց քաղաքացիության երկրից փախել են, քանի որ տվյալ երկրում իրենց կյանքին վտանգ է ներկայացնում։ Այդ վտանգը պետք է լինի հինգ հիմքերով՝ ազգային, կրոնական, ռասսայական, քաղաքական կամ սոցիալական հայացքների որոշակի խմբերի պատկանելիության։ Բայց Հայաստանը ևս 5 կետ է ավելացրել, որ կարողանանք ապաստան տալ, օրինակ՝ Սիրիայից փախած մեր հայրենակիցներին։ Մեր կողմից առաջարկած հինգ հիմքերն են՝ պատերազմական, ռազմական գործողությունները, արտաքին հարձակումը, հասարակական կարգի և մարդու իրավունքների խախտումները»,- նշեց նա։
Փախստականի հայցով դիմած քաղաքացիները դիմումի քննության երեք ամսում կացարան են տրամադրում օտարերկրացուն կամ, եթե անձը կարողանում է հոգալ իր կեցությունը, կարող է հրաժարվել, բացի այդ՝ անձին կամ/և նրա ընտանիքին պետբյուջեից հատկացվում է 15․000-20․000 ՀՀ դրամի չափով գումար։
«Երեք ամսվա ընթացքում հայցը քննվում է, եթե տալիս ենք դրական եզրակացություն, ապա դիմումատուն դառնում է փախստական մեր երկրում, եթե ոչ՝ ապա նրա և նրա ընտանիքի մնալն անօրինական է դառնում, ուստի՝ պարտավորվում է կա՛մ լքել հանրապետությունը, կա՛մ 60 օրվա ընթացքում բողոքարկել այն»,- նշեց Դավթյանը։
Նշենք՝ Միգրացիոն ծառայության տվյալներով՝ պատերազմական օրերին ՌԴ քաղաքացիներից ապաստանի որևէ հայց չի ստացվել։ 2021 թվականի տվյալներով՝ ողջ տարվա ընթացքում փախստականի կարգավիճակ ստանալու համար Ուկրաինայից ստացվել է 5, Ռուսաստանից՝ 7 դիմում։
Ռոզա Վարդանյան
