18.12.2025 | 23:24
ՀՀ տարածքում ավտոճանապարհները հիմնականում անցանելի են
ԵԱՀԿ-ում ԱՄՆ ներկայացուցչությունն անդրադարձել է Ադրբեջանի կողմից հայ զինծառայողի սպանությանը
Քաղաքականություն
11.03.2022 | 18:17
ԵԱՀԿ-ում ԱՄՆ մշտական ներկայացուցչությունն արձագանքել է հայ-ադրբեջանական սահմանին Ադրբեջանի ԶՈՒ-ի կողմից հայ զինծառայող Հրաչ Մանասարյանի սպանությանը։ Այս մասին տեղեկանում ենք ներկայացուցչության պաշտոնական կայքից։
«ԱՄՆ-ը սգում է հայ զինծառայող Հրաչ Մանասարյանի մահը, որը գրանցվել է մարտի 7-ին։ Այս ողբերգական մահը ընդգծում է ավելի մեծ զսպվածության, վիճելի սահմանային հատվածներում զինված ուժերի՝ միմյանցից հեռավորություն պահպանելու և առկա խնդիրների համապարփակ լուծումներ գտնելու համար դիվանագիտական ակտիվ ներգրավվածության անհրաժեշտությունը»,- ասվում է հայտարարության մեջ։
ԱՄՆ-ն նաև կողմերին կոչ է անում առաջընթաց գրանցել հումանիտար հարցերում՝ «բոլոր գերեվարվածների ազատ արձակումը, կորածների ինքնության մասին տեղեկատվության փոխանակումը, մարդասիրական ականազերծումը և մարդու իրավունքների ենթադրյալ խախտումների և միջազգային մարդասիրական իրավունքի խախտումների հետաքննության ուղղությամբ առաջ շարժվելը»։
«ԱՄՆ-ն այս տարի 5 միլիոն դոլարի մարդասիրական օգնություն է հատկացրել՝ ինչպես Հայաստանում, այնպես էլ Ադրբեջանում հակամարտություններից տուժած բնակչությանն աջակցելու համար: Միացյալ Նահանգները հավատարիմ է մնում Հարավային Կովկասի անվտանգ, կայուն, ժողովրդավարական, բարգավաճ և խաղաղ ապագան խթանելուն»,- ասվում է հայտարարության մեջ:
Էմմա Չոբանյան
