06.10.2026 | 14:23
Ռաֆինյան երկարաձգել է «Բարսելոնայի» հետ պայմանագիրը. Աղբյուր
Գործ անելիս «սնարյադը» կողքս տրաքեց․ Խրամորթի վիրավորված բնակիչը` ադրբեջանական սադրանքի մասին․ ՏԵՍԱՆՅՈՒԹ
10.03.2022 | 19:39
Խրամորթում առավոյան դարձյալ ականանետի արկեր են պայթել, 5-րդ ալիքի Արցախի թղթակիցը ֆիքսել է պայթյունի պահը, որի հետևանքով վիրավորում է ստացել Խրամորթի բնակիչ Սուրեն Բաղրյանը:
Նա այժմ Արցախի հանրապետական հիվանդանոցում է, նրա կյանքին վտանգ չի սպառնում: Բեկորային վիրավորումը մեջքի շրջանում է, բեկորը հեռացվել է։ 51-ամյա խրամորթցին պատմում է` առավոտյան բակում գործ էր անում, մի քանի ժամ ադրբեջանցիները լռել էին, առավոտյան գյուղի ուղղությամբ արձակված հենց առաջին արկի բեկորն է իրեն հասել. «Աշխատանքի տեղն եմ եղել, երևի 9:30, շարժման մեջ եմ եղել»:
Երեկ երեկոյից ողջ գիշեր միայն Խրամորթի ուղղությամբ ադրբեջանական կողմը ականանետի 23 արկ է կիրառել, երեխաներին, կանանց մեծ մասին տղամարդիկ տեղափոխել են գյուղից, պատմեց խրամորթցի Հասմիկ Անդրյանը. «Գիշերը ուսուցիչներով, բոլորով կազմակերպված իրար զանգեցին ու ասացին, որ երեխաներին գյուղից հանում ենք, որովհետև ներքևում շարժ ենք նկատել, արդեն թուրքերի խփած գնդակները շատ մոտ են, տների տանիքներին էին ընկնում բեկորները, դրա համար էլ իրար նայելով, բոլորս իրար զգուշացնելով երեխաներին վերցրինք ու դուրս եկանք գյուղից, բայց տղամարդիկ վերադարձան, այս պահին էլ գյուղում են: Որքան հնարավոր լինի, պիտի պահենք էլի, գյուղը չտանք»:
