«Ընդունում եմ պարոն Սվիտալսկու խոսքն ի գիտություն». Դավիթ Հարությունյան

Արդարադատության նախարար Դավիթ Հարությունյանն այսօր խորհրդարանում պատասխանելով factor.am-ի հարցին, թե չի՞ ափսոսում, որ նման գնահատական տվեց, քանի որ ԵՄ գրասենյակի ղեկավար Պյոտոր Սվիտակլսկու պատասխանը նաև իրեն էր ուղղված, ասաց. «Ես ընդունում եմ պարոն Սվիտալսկու խոսքն ի գիտություն»:

Նշենք, որ ԵՄ դեսպանը բավական կոշտ արձագանքեց ՀՀ իշխանությանը, երբ Դավիթ Հարությունյանը հայտարարեց, որ ԿԸՀ-ն ավելի արժանահավատ և վստահելի դարձնելու անհրաժեշտության մասին ԵՄ դեսպանի հայտարարությունը «որոշակի փորձ է մեր ներքին քաղաքական հարցերին միջամտելու, ինչը համարում եմ անթույլատրելի»:

Պյոտոր Սվիտալսկին էլ օրերս հանդես եկավ պատասխան հայտարարությամբ. «Եթե մեր աջակցությունն այլևս անցանկալի է, մենք չենք պարտադրի այն»՝ շեշտելով, որ Հայաստանի ինքնիշխանությանը սպառնացող վտանգն «այլ տեղում է»:  

Մեր հարցին, թե կա՞ որևէ նախադրյալ ԵՄ-ի հետ համագործակցությունից հրաժարվելու, Դավիթ Հարությունյանը պատասխանեց. «Որևէ նախադրյալ չկա: Ուղղակի մեր համագործակցությունը պետք է լինի հստակ այն շրջանակներում, որոնք պայմանավորված են մեր դիվանագիտական հարաբերություններով»:

Դավիթ Հարությունյանը Սվիտալկսու հետ հրապարակային բանավեճը չի համարում կոնֆլիկտ. «Սա ընդամենը հստակեցում է դիրքորոշումների: Իմ արձագանքը անձնական արձագանք չէր, նախարարի արձագանք էր»:  

Մանրամասները դիտեք factor.am-ի հետ արդարադատության նախարար Դավիթ Հարությունյանի հարցազրույցում:

Մարինե Խառատյան