14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Էրդողանը Պուտինին Մոսկվայի նկատմամբ արևմտյան պատժամիջոցները շրջանցող գործնական առաջարկ է արել․ աղբյուր
Քաղաքականություն
09.03.2022 | 22:45
Թուրքիայի իշխող «Արդարություն և զարգացում» կուսակցության հետ սերտ կապեր ունեցող լրագրողը պնդում է, որ նախագահ Ռեջեփ Թայիփ Էրդողանը կիրակի կայացած հեռախոսազրույցի ժամանակ ՌԴ նախագահ Վլադիմիր Պուտինին առաջարկել է ոսկու և տեղական արժույթների առևտուր սկսել Ռուսաստանի, Չինաստանի և Թուրքիայի միջև՝ շրջանցելու Արևմուտքի պատժամիջոցները, որոնք կիրառվել են Մոսկվայի դեմ Ուկրաինա ներխուժման պատճառով, գրում է Turkish Minute-ը։
Hurriyet-ի սյունակագիր Աբդուլքադիր Սելվին գրում է, որ Էրդողանը վերջերս ԱԶԿ-ի Կենտրոնական գործադիր խորհրդի փակ հանդիպման ժամանակ ասել է, որ ինքը հեռախոսով գործնական առաջարկ է արել Պուտինին, որը կշրջանցի Մոսկվայի նկատմամբ արևմտյան պատժամիջոցները։
«Երեք երկիր՝ ՌԴ-ն, Չինաստանն ու Թուրքիան, կարող են բիզնես անել մեր ազգային արժույթներով՝ ռուբլով, յուանով և լիրայով, ինչպես նաև ոսկով»,- Պուտինին ուղղված Էրդողանի խոսքերն է մեջբերում հոդվածագիրը։
Ընդգծելով, որ Ռուսաստանը Թուրքիայի առանցքային առևտրային գործընկերներից է, Սելվին գրում է, որ Էրդողանի առաջարկը պատմական քայլ է՝ օգնելու Ռուսաստանին, նաև Թուրքիայի համար ճգնաժամը հնարավորության վերածելու, որը կարող է անուղղակիորեն տուժել պատժամիջոցներից։
«Ռուսաստանը, որը մեկուսացված է աշխարհից, արդյո՞ք կքննարկի առևտրի տարբերակը Թուրքիայի և Չինաստանի հետ։ Ինչո՞ւ ոչ»,- եզրափակում է հեղինակը։
Նշվում է, որ Էրդողանի այս առաջարկը Պուտինին կարող է է՛լ ավելի սառեցնել ԱՄՆ նախագահ Ջո Բայդենի հետ արդեն իսկ սառը հարաբերությունները։
Էմմա Չոբանյան
