06.10.2026 | 11:38
Նարեկ Կարապետյանի ճեպազրույցը․ ՈՒՂԻՂ
Արցախում 2 օր է՝ գազ չկա․ ադրբեջանական սադրանքները հաճախակի են դարձել, զինատեսակների տրամաչափը՝ աճել․ ՏԵՍԱՆՅՈՒԹ
Քաղաքականություն
09.03.2022 | 21:54
«Գազ չկա, փայտ ենք վառում»․ Ադրբեջանի վերահսկողության տակ գտնվող Շուշի-Լիսագոր-Բերձոր հատվածում գազատարի վթարից հետո Արցախում երկու օր է՝ զրկվել են բնական գազից։ Ադրբեջանական կողմը խոչընդոտում էր վնասված խողովակաշարի վերանորոգման աշխատանքները սկսելուն։ Ռուս խաղաղապահների հետ բանակցություններից հետո վթարված մայրուղային գազատարի մերձակայքում ականազերծում է իրականացվում, որից հետո կմեկնարկեն վերականգնման աշխատանքները, տեղեկացնում է Արցախի ՆԳՆ ԱԻ պետական ծառայությունը։
44-օրյա պատերազմից հետո Արցախում նման իրավիճակ է ստեղծվել առաջին անգամ, Factor TV-ի հետ զրույցում ասում է Նորշենի բնակիչը։ Արցախի ԱԳ նախարար Դավիթ Բաբայանն էլ նշում է, որ Արցախում գազամատակարարումը վերականգնելու ուղղությամբ ամեն ինչ արվում է։
Անդրադառնալով համացանցում տարածվող այն լուրերին, թե ռուս խաղաղապահները փակել են Արցախի տարածքում ադրբեջանական ավտոշարասյան տեղաշարժերը՝ Արցախի ԱԳ նախարարը նշեց, որ նման տեղեկություն չունի։
Ուկրաինայում պատերազմի ֆոնին ադրբեջանական կողմը հաճախակի է դարձրել սադրանքները ոչ միայն Արցախում, այլև ՀՀ-ի հետ սահմանին։
Այսօր ժամը 14։00-14։30-ի սահմաններում ադրբեջանական կողմը Մարտունու շրջանի Խնուշինակ գյուղի ուղղությամբ տեղակայված դիրքերից խախտել է հրադադարը։ Կիրառվել է 60 մմ տրամաչափի ականանետ, արձակվել է 4 ական։ Տուժածներ չկան։
Ականանետից երեկ թիրախավորվել էր նաև Ասկերանի շրջանի Խրամորթ գյուղին հարակից գերեզմանոցը։ Արձակվել էր 2 ական։
«Տուժածներ չկան, ժողովուրդը նորմալ կայնքով ապրում է»,- ասում է Խրամորթի գյուղապետ Զորիկ Աբրահամյանը։
Այս դեպքից առաջ էլ կրակոցներ լսվել էին Մարտունու շրջանի Նորշեն գյուղում․ բացի այդ՝ ադրբեջանցիները նաև բարձրախոսով հայերեն ձայնագրությամբ սպառնացել էին, որ գյուղացիները լքեն նռան այգիները, որտեղ այդ պահին աշխատում էին, հակառակ դեպքում՝ կկրակեն։ Դեպքից հետո այգեգործները դադարեցրել են աշխատանքները։ Օրեր առաջ նման սպառնալիքներ հնչել էին նաև Խրամորթում։
Նորշենում ևս, ինչպես Խրամորթում, ռուս խաղաղապահներ տեղակայված չեն․ գալիս են այն դեպքում, երբ գյուղերում որևէ միջադեպ է լինում։ Բանակցում են ադրբեջանական կողմի հետ, որից հետո իրավիճակը հանդարտվում է, կամ էլ խաղաղապահները ստիպված են լինում մնալ գյուղում, որպեսզի գյուղացիները կարողանան աշխատել։
«Նորշենը կենտրոնում է՝ նշանառության տակ»,- ընդգծում է նորշենցի Արթուր Ասրյանը։
Ադրբեջանցիների նպատակն է խուճապի մատնել բնակիչներին և վախի մթնոլորտ ձևավորել։ Հակառակ դրան՝ գյուղացիները չեն վախենում ու չեն լքում գյուղը։ Այս պահին Խրամորթում ու Նորշենում գյուղատնտեսական աշխատանքները շարունակվում են։
Ադրբեջանն այսօր հրադադարի ռեժիմը խախտել է նաև հայ-ադրբեջանական սահմանին՝ ժամը 13։10-ի սահմաններում տարբեր տրամաչափի հրաձգային զինատեսակներից կրակ բացելով հայ-ադրբեջանական սահմանի արևմտյան հատվածում տեղակայված հայկական մարտական դիրքերի ուղղությամբ։ Պաշտպանության նախարարությունից հայտնում են՝ հայկական կողմի պատասխան գործողություններով հակառակորդի կրակը լռեցվել է։ Ժամը 15։00-ի դրությամբ՝ իրադրությունը սահմանի այդ հատվածում հարաբերականորեն կայուն է։
Մանրամասները՝ տեսանյութում։
Արփի Հակոբյան
