Ես էլ եմ պատրաստ լինել վարչապետ․ Էդմոն Մարուքյանը՝ Կարեն Կարապետյանին

Կառավարության 2017-2022 թվականների գործունեության ծրագրի քննարկման ժամանակ «Ելք» խմբակցության պատգամավոր Էդմոն Մարուքյանը հայտարարեց, որ իրենց այդպես էլ չհաջողվեց հասկանալ՝ 2018-ից հետո ով է լինելու երկրի վարչապետը։ 
Անդրադառնալով վարչապետի այն խոսքին, թե պատրաստ է լինել վարչապետ, Մարուքյանը հակադարձեց՝ ինքն էլ է պատրաստ ու «լիքը մարդ կա, պատրաստ է», սակայն խնդիրն այլ է:

«Քաղաքական մեծամասնություն մենք չունենք, բայց ուզում ենք հասկանալ այսօրվա վարչապետն ունի՞ քաղաքական մեծամասնություն, թե՝ չէ, այդ հարցին չեք կարողանում պատասխանել»,- ասաց Մարուքյանը՝ կրկին նկատելով, թե վարչապետն «անհավես, անէմոցիա» էր ներկայացնում ծրագիրը։

«Նախկինը չեք պարոն վարչապետ, չգիտեմ ՀՀԿ-ն ինչ է արել, բայց էլ նախկինը չեք»,- նկատեց նա։

Պատգամավորն անդրադարձավ վարչապետի ելույթի հիմնական դրույթներին, թե սահմանը փակ է, 7 մլն հայ դրսում է, մշակույթը հզոր զենք է, և պոպուլիզմից պետք է հրաժարվել․ «Երկրում ամենից շատը Ձեզ են պոպուլիզմի համար մեղադրում, հիմա 43% ձայն եք հավաքել Ձեր պոպուլիզմի համար, դա էլ անցավ, էլ չեն հավատում»։

Պատգամավորի խոսքով՝ մինչ այս պահն իր համար անհասկանալի է, թե որն է վարչապետի տեսլականը ՀՀ արտաքին քաղաքականության վերաբերյալ, ապա անդրադարձավ Կարեն Կարապետյանի գործուղումներին, որոնք մշտապես դեպի ԵԱՏՄ անդամ պետություններ են եղել, ինչպես՝ Մինսկ, Մոսկվա, Ղրղզստան:

 «Սրանից հետո էլի մի քանի հայ-ռուսական հանդիպումներ… բարձր տեխնոլոգիաների մասին եք խոսում, այն դեպքում, երբ առաջադեմ մոտեցումները, փողը Արևմուտքում է, մի հատ արևմտյան այց չի կազմակերպվել Ձեզ համար և հարց է, փորձե՞լ եք, չի եղել, թե՞ չեք էլ կազմակերպել: Այս հարցերը կարևոր են ու մտահոգիչ: Ի՞նչ է արվում, որ ներդրումներ գան, այդ մարդկանց ո՞վ պետք է համոզի»,-հարցրեց նա։

Ըստ Մարուքյանի՝ վարչապետի բոլոր այցերը դեպի ԵԱՏՄ երկրներ են, այն դեպքում, երբ ԵԱՏՄ-ի անդամ երկրների կազմում գտնվող ՀՀ քաղաքացիների «շահերը ոտնահարվում են»․ «ՀՀ վարորդական իրավունքով հնարավոր չէ ՌԴ-ում ծառայություններ կամ ազատ տեղաշարժ իրականացնել, ինչո՞ւ չեք պաշտպանում պարոն վարչապետ: Կարմիր լույսի տակ անցնելու համար մարդկանց դեպորտ են անում, պատկերացնո՞ւմ եք, եթե Գերմանիայում Բելգիայի քաղաքացուն դեպորտ անեն»:

Սեդա Ղուկասյան