Ադրբեջանի ՊՆ ղեկավարը ծառայողական խորհրդակցություն է անցկացրել

Ադրբեջանի պաշտպանության նախարար Զաքիր Հասանովի գլխավորությամբ այսօր կենտրոնական հրամանատարական կետում տեղի է ունեցել ծառայողական խորհրդակցություն, գրում են ադբեջանական լրատվամիջոցները։

Հանդիպմանը մասնակցել են փոխնախարարներ, տարբեր զորքերի հրամանատարներ, գերատեսչությունների, գլխավոր վարչությունների, ծառայությունների ղեկավարները։ Նշվում է, որ տեսակապով մասնակցել են նաև Արցախի գրավյալ տարածքներում տեղակայված ստորաբաժանումների հրամատարները։

Հասանովը հանձնարարական է տվել անհապաղ պատասխանել «ադրբեջանական բանակի դեմ սադրանքներին»։

«Գնահատելով իրավիճակը հայ-ադրբեջանական սահմանին և Ադրբեջանի այն տարածքներում, որտեղ ժամանակավորապես տեղակայված է ռուսական խաղաղապահ զորախումբը՝ պաշտպանության նախարարը հանձնարարականներ է տվել ադրբեջանական ստորաբաժանումների դեմ հնարավոր սադրանքներին անհապաղ համարժեք պատասխան տալու վերաբերյալ՝ պահպանելով մարտական պատրաստության մշտական բարձր մակարդակը»,- ասվում է Ադրբեջանի ՊՆ հայտարարության մեջ։

Հարկ է նկատել, որ չի բացառվում՝ ադրբեջանական կողմը նոր սադրանքների է նախապատրաստվում, ինչպես այսօր։ Մասնավորապես, մարտի 7-ին, ժամը 12։40-ի սահմաններում, Ադրբեջանի ԶՈՒ ստորաբաժանումները նշանառու կրակ են բացել հայ-ադրբեջանական սահմանի արևմտյան հատվածում տեղակայված հայկական մարտական դիրքերի ուղղությամբ, ինչի հետևանքով հրազենային վիրավորում է ստացել ՀՀ ԶՈՒ երկու զինծառայող։ Նրանցից մեկը՝ ՀՀ ՊՆ N զորամասի պայմանագրային զինծառայող, սերժանտ Հրաչ Արամի Մանասարյանը, հիվանդանոց տեղափոխվելու ճանապարհին մահացել է։ Բացի այդ`Ադրբեջանը շարունակում է խախտել հրադադարի ռեժիմն Արցախում։

Էմմա Չոբանյան