Հայաստանում կորոնավիրուսի դեմ պատվաստումների մեկնարկից ի վեր անցել է ավելի քան երկու տարի․ մեր երկիրը պատվաստանյութի առաջին խմբաքանակը ստացավ 2020 թվականի դեկտեմբերին, երբ Ռուսաստանը նվիրեց «Սպուտնիկ V» պատվաստանյութի առաջին խմբաքանակը, որը նախատեսված էր բուժաշխատողների համար։
Հայաստանը տարբեր պատվաստանյութեր սկսեց ստանալ արդեն 2021-ի մարտից։ Վերջերս էլ Հայաստանում առկա պատվաստանյութերի թիվն ավելացավ ևս մեկով՝ ներկրվեց Pfizer պատվաստանյութի 100 հազար դեղաչափ։ Նշենք, սակայն, որ այս պատվաստանյութը մեր երկիր պիտի ներկրվեր ավելի վաղ՝ դեռ 2021 թվականի սեպտեմբեր-հոկտեմբերին։
Չնայած Հայաստանում առկա պատվաստանյութերի բազմազանությանը՝ պատվաստումների ցուցանիշով Հայաստանը շարունակում է հետնապահ մնալ․ պատվաստումների մեկնարկից ի վեր բնակչության ընդամենը 37 տոկոսն է պատվաստված։
Factor.am-ը գրավոր հարցում էր ուղարկել ՀՀ Առողջապահության նախարարություն՝ պարզելու, թե պատվաստումների մեկնարկից ի վեր ժամկետն անցնելու պատճառով քանի դեղաչափ պատվաստանյութ է խոտանվել և որքան է կազմում դրանց շուկայական արժեքը։
Գերատեսչության ներկայացրած տվյալների համաձայն՝ Հայաստանի բժշկական օգնություն և սպասարկում իրականացնող կազմակերպություններում պիտանիության ժամկետը լրանալու պատճառով խոտանվել է «Աստրազենեկա» պատվաստանյութի 29․210 դեղաչափ և «Մոդեռնա» պատվաստանյութի 44․260 դեղաչափ։
Նախարարությունը տեղեկացնում է՝ խոտանված պատվաստանյութերը ՀՀ-ն որպես նվիրատվություն էր ստացել։
Նշենք, որ Հայաստանում այս պահին առկա են «ԱստրաԶենեկա», «Սպուտնիկ», «Սպուտնիկ լայթ», «Սինոֆարմ», «Մոդեռնա» և «Pfizer» պատվաստանյութերը։
Մանրամասները՝ տեսանյութում։
Արփի Հակոբյան
