16.01.2025 | 20:13
Մեծ Բրիտանիան և Ուկրաինան 100-ամյա գործընկերության համաձայնագիր են ստորագրել
Գերմանիայի կառավարությունը հրաժարվել է ՆԱՏՕ-ի ուժերի միջոցով ապահովել Ուկրաինայի երկնքում ոչ թռիչքային գոտին
Քաղաքականություն
07.03.2022 | 10:53
Գերմանիայի արտգործնախարար Աննալենա Բերբոքը հաստատել է, որ Գերմանիայի կառավարությունը հրաժարվել է ՆԱՏՕ-ի ուժերի միջոցով ապահովել Ուկրաինայի երկնքում ոչ թռիչքային գոտին։ Հակառակ դեպքում՝ դա կնշանակեր, որ ՆԱՏՕ-ի ինքնաթիռները պետք է խոցեն ռուսական ինքնաթիռները։
«Իսկ դա կնշանակեր, որ մենք ուղղակիորեն ներգրավված ենք այդ պատերազմում»,- մեկնաբանել է գերմանացի դիվանագետը՝ ելույթ ունենալով ARD հեռուստաալիքի եթերում, գրում է DW-ի ռուսական ծառայությունը։
«Եթե դա այդքան հեշտ լիներ, մենք այսօր անհապաղ կգտնեինք այդ հեշտ լուծումը։ Եթե մենք կարողանայինք կանգնեցնել այդ պատերազմը, դադարեցնել մայրերի, հայրերի, երեխաների տառապանքը, մենք նույն վայրկյանին կանեինք։ Սակայն մենք պատասխանատվություն ենք կրում, որպեսզի այս պատերազմը չվերածվի Երրորդ համաշխարհայինի»,- հավելել է Բերբոքը։
Նա ևս մեկ անգամ դատապարտել է Ռուսաստանի Դաշնության ղեկավարության, մասնավորապես՝ նախագահ Վլադիմիր Պուտինի գործողությունները։
«Այն, ինչ մենք տեսնում ենք, այն, ինչ նա (Վլադիմիր Պուտինը) անում է, հազարապատիկ անգամ ագրեսիա է։ Նրա տանկերը խաղաղություն չեն բերում, դրանք միայն վիշտ են բերում։ Պուտինը «խախտում է միջազգային իրավունքի բոլոր կանոնները, մարդկային համակեցության բոլոր կանոնները»,- ասել է Գերմանիայի ԱԳՆ ղեկավարը։
Բերբոքը, միաժամանակ, հիշեցրել է, որ Արևմուտքը «տնտեսական և ֆինանսական միջոցների օգնությամբ կիրառել է բոլոր լծակները՝ Ռուսաստանի նախագահի վրա առավելագույն ճնշում գործադրելու համար»։
Հիշեցնենք, որ ուրբաթ՝ մարտի 4-ին, ՆԱՏՕ-ի գլխավոր քարտուղար Յենս Ստոլտենբերգը հայտարարել էր, որ դաշինքի անդամ երկրները միակարծիք են, որ ՆԱՏՕ-ի ռազմական ինքնաթիռներն Ուկրաինայի վրայով ոչ թռիչքային գոտի չեն ապահովի։ Ուկրաինայի նախագահ Վլադիմիր Զելենսկին իր հերթին կտրուկ քննադատել էր այս որոշումը։
Տաթև Ֆռանգյան
