ԵՐԵՎԱՆԻ ԺԱՄԱՆԱԿՈՎ․ Եթե արդարացնում ես Ուկրաինայի նկատմամբ բռնությունը, վաղ թե ուշ այն կգա քո տուն. Կարեն Անտաշյան. ՏԵՍԱՆՅՈՒԹ

«21-րդ դարում, երբ այնքան խոսվել է քաղաքակրթության, առաջադիմության մասին, երբ ասվել է, որ ինտելեկտուալ դիսկուրսը նախընտրելի է բռնությունից, եթե լռում ես, արդարացնում ես բռնությունը, վաղ թե ուշ այն կգա քո տուն: Եթե չկարեկցենք Ուկրաինայի ժողովրդին, գոյություն ունենալու իրավունք ենք տալիս բռնությանը, որը կարող է երբևէ կիրառվել մեր դեմ»,- Factor TV-ի հետ զրույցում նման տեսակետ է հայտնում բանաստեղծ Կարեն Անտաշյանը՝ խոսելով Ռուսաստանի կողմից Ուկրաինայի նկատմամբ սանձազերծած պատերազմի մասին:

Բանաստեղծն անդրադառնում է նաև հայ-թուրքական հարաբերությունների հնարավոր կարգավորմանը, տեսակետ հայտնում, որ պատմական առաքելությունը, որը մեր առջև դնում են ծայրահեղ ազգայնական կազմակերպությունները և ազգային գաղափարախոսության ջատագովները, շատ անիրական է։

«Նախընտրելի է բարևել, խոսել, հաց ուտել, առևտուր անել թուրքերի հետ. սա մեզ համար ճիշտ ճանապարհ է: Անգամ սահմանները փակ լինելու դեպքում, եթե համապատասխան պատմական իրավիճակ ստեղծվի, թուրքերը կարող են ոչնչացնել Հայաստանը, այնպես որ՝ պաշտպանական նկատառումներով անիմաստ է հայ-թուրքական հարաբերությունները փակ և խզված պահել. երկխոսությունն է ճանապարհը»,- ասում է նա:

Կարեն Անտաշյանն անդրադառնում է նաև ներկայիս մտավորականությանը, դրա դերին: Նա նկատում է, որ հասարակությունը, որը չի ծնում տաղանդավոր և միևնույն ժամանակ բարոյական, ընդունելի կերպարներ, հանկարծ այդպիսի մտավորականներ ունենալու հայտ է ներկայացնում և հարցնում` ուր են մեր մտավորականները. «Անշուշտ, ես ծաղրում եմ մտավորականության այն ինստիտուտը, որը հավաստիություն չունի և ինքս ինձ հռչակում եմ «մոտավորական»»:

Մանրամասները` տեսանյութում:

Աննա Բաբաջանյան