08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Անչափահաս Էրիկ Խաչատրյանին 3-7 տարվա ազատազրկման մեղադրանք առաջադրվեց՝ Հանրային ռադիո ներխուժելու համար
Հասարակություն
21.04.2018 | 14:10
ՀՔԾ-ն մեղադրանք է առաջադրել Նիկոլ Փաշինյանի հետ Հանրային ռադիո ներխուժելու ու ուղիղ եթեր պահանջելու համար ձերբակալված 16-ամյա Էրիկ Խաչատրյանին: Ըստ այդմ՝ նա մեղադրվում է ՀՀ քր.օրի 225-րդ հոդվածի 2 մասով, որով նրան սպառնում է 3-7 տարվա ազատազրկում։
Այս մասին տեղեկացանք Էրիկի փաստաբան Ինեսա Պետրոսյանից: Նշենք, որ երեկ ՀՔԾ-ն որոշում էր կայացրել ավելի վաղ ձերբակալված անչափահաս Էրիկի խափանման միջոցը փոխելու մասին և որոշվել էր նրան ազատ արձակել՝ հանձնելով ծնողի հսկողությանը:
ԱԺ «Ելք» խմբակցության պատգամավորներ Էդմոն Մարուքյանը, Գևորգ Գորգիսյանը, Արտակ Զեյնալյանը և Մանե Թանդիլյանը անձնական երաշխավորություն էին ուղարկել նախաքննության մարմնին՝ խնդրելով ազատ արձակել անչափահասին, որը անձնագիր չունի ու չի կարող լքել հանրապետությունը:
Էրիկ Խաչատրյանը 16 տարեկան է, սովորում է Զարդարվեստի պետական քոլեջում։ Անչափահաս Էրիկին ոստիկանները բերման են ենթարկել երթուղայինի միջից՝ Ազատամարտիկների փողոցից։ Անչափահաս տղային տեղափոխել են Կենտրոնի քննչական բաժին, որտեղ նրան թույլ չէին տվել, որ զանգի ծնողին, տեղեկացնի։
Մարինե Խառատյան
