18.08.2026 | 17:41
Հայտնի է «Ուժեղ Հայաստանի»՝ Եվրաինտեգրման հարցերի մշտական հանձնաժողովի նախագահի թեկնածուի անունը
Ավելի քան 2000 զոհ՝ Ուկրաինայի խաղաղ բնակչության շրջանում․ նոր պատժամիջոցներ ՌԴ-ի դեմ. ՏԵՍԱՆՅՈւԹ
Քաղաքականություն
02.03.2022 | 21:02
Ուկրաինայում ռազմական գործողությունների մեկնարկից մեկ շաբաթ անց իրավիճակը շարունակում է լարված մնալ։ Երկրի արտակարգ իրավիճակների պետական ծառայությունը հայտնում է, որ պատերազմի առաջին օրից մինչ հիմա ավելի քան 2000 խաղաղ բնակիչ է զոհվել։ Կառույցի պնդմամբ՝ պատերազմի յոթ օրերի ընթացքում ռուսական զինուժը ոչնչացրել է հարյուրավոր տրանսպորտային ենթակառուցվածքներ, բնակելի շենքեր, հիվանդանոցներ և մանկապարտեզներ։ Իրավիճակը լարված է նաև Կիևում և հարակից մի քանի քաղաքներում։
Իսկ Ուկրաինայի Դոնեցկի մարզի հայերի միության նախագահը Factor TV-ի հետ զրույցում տեղեկացնում է, որ մարդիկ տարհանվելու խնդիր ունեն, Մարիուպոլն արգելափակված է, սակայն փորձում են բանակցել, որպեսզի բացեն և խաղաղ բնակիչները կարողանան դուրս գալ։
Ուկրաինայում գտնվող հայերի տարհանմանն ու նրանց ուղղված աջակցությանն այսօր Ազգային ժողովում անդրադարձավ Արտաքին գործերի նախարար Արարատ Միրզոյանը հայտարարելով՝ Հայաստանը պատրաստ է աջակցություն ցուցաբերել ոչ միայն Ուկրաինայում գտնվող հայերին, այլ նաև մյուս փախստականներին:
«Մինչ այսօր Կիևում մեր դեսպանությունը ողջ կազմով շարունակում էր աշխատել: 1500-ի կարգի զանգ են ստացել, կարող եմ ասել, որ, իհարկե, այս մեծ քանակի դեպքում կլինեն քաղաքացիներ, ովքեր փորձել են կապ հաստատել, բայց չի ստացվել: Դրա համար ՀՀ ԱԳՆ-ում թեժ գիծ է հաստատվել»,- նշեց Միրզոյանը։
Մինչ այդ ՄԱԿ-ը ռազմական գործողությունների մեկնարկից ի վեր Ուկրաինան լքածների մասին նոր տվյալներ է ներկայացրել։ Մասնավորապես, վերջին 6 օրերի ընթացքում Ուկրաինայից հեռացել է ավելի քան 800 հազար մարդ, տարբեր տվյալներով՝ շուրջ 450․000 ուկրաինացի Լեհաստանի տարածք է անցել։
Այս ընթացքում Արևմուտքը շարունակում է պատժամիջոցներ կիրառել Ռուսաստանի դեմ։ Այսօր հաստատվեց տեղեկությունը, որ Եվրամիությունը ռուսական յոթ բանկեր անջատել է միջազգային SWIFT վճարային համակարգից։ Այդ բանկերն են ՎՏԲ-ն, Ռոսիան, Օտկրիտիեն, Նովիկոմբանկը, Պրոմսվյազբանկը, Սովկոմբանկը և ՎԷԲ-ը։ ԵՄ-ն, սակայն, ընդգծում է՝ կառույցը չի կարողանա ամբողջությամբ և անմիջապես Ռուսաստանին անջատել SWIFT-ից։
Մանրամասները՝ տեսանյութում։
Ռոզա Վարդանյան
