Ինչ է արվում Ուկրաինայից և Ռուսաստանից վերադարձող հայերին օժանդակելու համար․ պարզաբանում է Սփյուռքի գործերի գլխավոր հանձնակատարի` Հայրենադարձության գծով պատասխանատուն

Հունվարի 28-ի դրությամբ Սփյուռքի գործերի գլխավոր հանձնակատարի գրասենյակում ավելացել են Ռուսաստանում և Ուկրաինայում բնակվող հայերից ստացված հարցումները, զանգերը։ Այս մասին Factor.am-ի հետ զրույցում ասաց Սփյուռքի գործերի գլխավոր հանձնակատարի Հայրենադարձության գծով պատասխանատու Հովհաննես Ալեքսանյանը։

«Հիմնական հարցադրումը հետևյալն է՝ ի՞նչ ճանապարհով կարող են Ուկրաինայի տարածքից դուրս գալ, ինչպե՞ս է վերադարձի գործընթացը հնարավոր և կարո՞ղ են որևէ օժանդակություն ակնկալել մեր հայրենակիցները։ Ունենք զանգեր նաև Ուկրաինայի տարբեր քաղաքներից՝ սահման հասնելիս հնարավոր օժանդակություն ցույց տալու մասով։ Սակայն նշեմ, որ օրինակ՝ Կիևից այս պահի դրությամբ դուրս գալը հնարավոր չէ․ կան տարածքներ, որտեղից այս պահին հնարավոր չէ հեռանալ և շատ դժվար է այդ հարցը հիմա կարգավորել»,- նշեց Ալեքսանյանը։

Ըստ Ալեքսանյանի՝ Սփյուռքի գործերի գլխավոր հանձնակատարի գրասենյակը նաև ակտիվ աշխատանք է տանում Լեհաստանի, Սլովակիայի, Ռումինիայի և Չեխիայի հայկական համայնքային կազմակերպությունների հետ, որպեսզի այդ երկրների տարածքը որպես տրանզիտ օգտագործվի ՀՀ քաղաքացիների վերադարձը Հայաստան օժանդակելու հարցում։ Հայ համայնքի ներկայացուցիչներին հնարավորություն կտրվի նաև 1-2 օրով կանգառ ունենալ, կլուծվի կացարանի և սննդի խնդիրը՝ մինչև նրանք կարողանան տոմս ձեռք բերել և վերադառնալ հայրենիք։

«Օրվա կտրվածքով 15-20 զանգ ենք ստացել արդեն։ Մեծ դիմումների հոսք և ընթացակարգերի վերաբերյալ հարցումներ ունենք հիմա, թե ինչպես ստանալ ՀՀ քաղաքացիություն՝ Ռուսաստանի Դաշնությունից»,- հավելեց Հովհաննես Ալեքսանյանը։

Հիշեցնենք՝ Ուկրաինայում արդեն 5 օր է՝ շարունակվում են ռազմական գործողությունները։ Երկար բանակցությունների արդյունքում՝ այսօր Բելառուսում վերջապես հանդիպեցին Ռուսաստանի Դաշնության և Ուկրաինայի պատվիրակության ներկայացուցիչները՝ հակամարտության շուրջ բանակցելու համար։ Բանակցությունները քիչ առաջ ավարտվեցին։ Մանրամասներ չեն հաղորդվում։

Ռոզա Վարդանյան