24.04.2026 | 09:35
Փաշինյանն ու բարձրաստիճան այլ պաշտոնյաներ հարգանքի տուրք մատուցեցին Հայոց ցեղասպանության զոհերի հիշատակին․ ՏԵՍԱՆՅՈՒԹ
Եվրոպան կարող է վերջին տարիների խոշորագույն մարդասիրական ճգնաժամի ականատեսը դառնալ
Քաղաքականություն
28.02.2022 | 15:14
Եվրոպան կարող է դառնալ վերջին տարիների խոշորագույն մարդասիրական ճգնաժամի ականատեսը։ Նման նախազգուշացմամբ է հանդես եկել Եվրահանձնաժողովը Ուկրաինայից մարդկանց զանգվածային փախուստի ֆոնին։ Ավելի քան 360 հազար մարդ արդեն լքել է երկիրը, նրանցից 200 հազարը հատել է Լեհաստանի հետ սահմանը։ Սակայն ԵՄ-ն պետք է պատրաստվի է՛լ ավելի մեծ ծավալի մարդասիրական ճգնաժամի, գրում է Euronews-ը։
«Ինչ վերաբերում է ընդհանուր առմամբ մարդասիրական իրավիճակին, ապա այս պահին տեղահանված ուկրաինացիների ակնկալվող թիվը շուրջ 7 միլիոն է, և վատագույն դեպքում, եթե այս ագրեսիվ պատերազմը շարունակվի, նրանց սուր անհրաժեշտ կլինի մարդասիրական օգնություն»,- ասել է ճգնաժամային կառավարման հարցերի եվրոպական հանձնակատար Յանեզ Լենարչիչը։
Մարդկանց օգնելու համար Եվրահանձնաժողովն արդեն կոչ է արել ԵՄ անդամ երկրներին՝ կրճատել բյուրոկրատական քաշքշուկը պատերազմից փախած Ուկրաինայի քաղաքացիների համար: Փաստացիորեն, դաշինքի բոլոր 27 երկրները համաձայնել են ընդունել ուկրաինացի փախստականներին՝ չկիրառելով ապաստան տրամադրելու ստանդարտ ընթացակարգը, որը հաճախ երկար է ձգձգվում։ Այս որոշումն ընդունվել է միաձայն՝ ԵՄ ներքին գործերի նախարարների հանդիպման արդյունքներով։
Բաց դռների քաղաքականությունը կգործի երեք տարի։ Եվրամիությունը մտադիր է նաև միջոցներ հատկացնել՝ ճգնաժամի առաջնագծում գտնվող երկրներին աջակցելու համար։ Լեհաստանի հետ մեկտեղ՝ Հունգարիան, Սլովակիան և Ռումինիան նույնպես բացում են իրենց սահմանները՝ ռմբակոծությունից փրկվել փորձողներին ընդունելու համար:
Տաթև Ֆռանգյան
