«Պետք է հարգանք լինի՝ հարգանքի դիմաց», «Սկզբում դո՛ւք հարգեք». վեճ՝ Վլ. Վարդանյանի և Մանուկյանի միջև․ ՏԵՍԱՆՅՈՒԹ

«Հարց եք տվել, պատասխանում եմ, Ձեզ չի՞ հետաքրքրում: Ես տվել եմ իմ պատասխանը՝ հարգանք հարգանքի դիմաց, հարգանքի բացակայություն հարգանքի բացակայության դիմաց»,-ԱԺ Պետական-իրավական հարցերի մշտական հանձնաժողովի այսօրվա նիստում «Ձերբակալված և կալանավորված անձանց պահելու մասին» օրենքում փոփոխություններ կատարելու մասին նախագծի քննարկման ժամանակ նշեց հանձնաժողովի նախագահ Վլադիմիր Վարդանյանը՝ դիմելով «Հայաստան» խմբակցության պատգամավոր Արամ Վարդևանյանին, ով հարց էր ուղղել, սակայն զրուցում էր թիմակից պատգամավորների հետ:

Վարդանյանին արձագանքեց «Հայաստան» խմբակցության պատգամավոր Արեգնազ Մանուկյանը. «Քանի որ դուք հարգանք պահանջեցիք, ցավում եմ, որ ուշադրություն չեք դարձրել, որ ձեր կողքին նստած գործընկերներն ամբողջ նիստի ընթացքում, հատկապես իմ գործընկերների՝ հարցի ներկայացման, հարցերին պատասխանելու, պարզաբանելու ընթացքում ծիծաղում էին, իրենց շատ անդաստիարակ էին պահում, ուրիշ բառ չեմ գտնում ասելու, այնպես որ հարգանք պահանջելուց առաջ նախ դուք հարգեք այս կողմում նստած մարդկանց, հարգեք նրանց տեսակետներ երկայացնելու իրավունքը, հետո նոր պահանջեք մյուսներից, առաջինը դուք եք խախտել դա: Ինձ մոտ տպավորություն է, կարծես մանկապարտեզում լինեմ»:

«Քաղաքացիական պայմանագիր» խմբակցության պատգամավոր Վահագն Հովակիմյանը, դիմելով Մանուկյանին , նշեց. «Այստեղ կարող ենք շատ բուռն բանավիճել, բայց երբեք վիրավորանք չի հնչել, խնդրում եմ այդ գործելաոճը պահել»:

Մանրամասները՝ տեսանյութում: