08.06.2026 | 14:37
Նիկոլ Փաշինյանին հաջողություն ենք մաղթում․ Վրաստանի խորհրդարանի նախագահ
ԵՄ-ում հաստատել են ՌԴ ԿԲ-ի ակտիվները սառեցնելու և SWIFT-ին հասանելիությունը սահմանափակելու մտադրությունը
Հասարակություն
27.02.2022 | 23:14
Եվրահանձնաժողովի նախագահ Ուրսուլա ֆոն դեր Լյայենը հաստատել է Եվրամիության և նրա գործընկերների մտադրությունը՝ սառեցնել Ռուսաստանի Կենտրոնական բանկի ակտիվները և արգելափակել SWIFT համակարգին ռուսական որոշ բանկերի մուտքը։
«Բոլոր միջոցները համընկնում են այն հզոր փաթեթի հետ, որը ես ներկայացրի երեկ երեկոյան, և որը համաձայնեցվել է միջազգային գործընկերների հետ»,- Interfax.ru-ի փոխանցմամբ՝ ասել է Լյայենը ԵՄ դիվանագիտության ղեկավար Ժոզեպ Բորելի հետ կայացած մամուլի ասուլիսում:
«Այս փաթեթը հետևյալն է. ռուսական կարևոր բանկերը դուրս կմնան SWIFT համակարգից, մենք նաև կարգելենք Ռուսաստանի կենտրոնական բանկի գործարքները և կսառեցնենք նրա բոլոր ակտիվները։ Մենք թիրախավորում ենք նաև ռուս օլիգարխների ակտիվները», – հայտարարել է նա։
NBC հեռուստաալիքը, վկայակոչելով SWIFT-ի հայտարարությունը, հայտնել է, որ համակարգի ղեկավարները պատրաստ կլինեն կատարել ԱՄՆ-ի և ԵՄ-ի որոշումը՝ անջատել ռուսական որոշ բանկեր, եթե համապատասխան հրահանգ ստանան։
Ավելի վաղ նույն ասուլիսում Ուրսուլա ֆոն դեր Լյայենը հայտարարել էր, որ Եվրամիությունն ամբողջությամբ փակում է իր երկրների օդային տարածքը ռուսական ինքնաթիռների համար։
Փետրվարի 24-ին ՌԴ նախագահ Վլադիմիր Պուտինը հայտարարել է Ուկրաինայում հատուկ ռազմական գործողության մասին՝ ի պատասխան Դոնբասի հանրապետությունների ղեկավարների օգնության դիմումի։ Դրանից հետո ԱՄՆ-ը, ԵՄ-ն, Մեծ Բրիտանիան, ինչպես նաև մի շարք այլ երկրներ հայտարարել են, որ պատժամիջոցներ են սահմանում ռուս ֆիզիկական և իրավաբանական անձանց դեմ։
