Փաշինյանը խոսնակ չունի արդեն չորս ամիս. կառավարությունից չեն հստակեցնում՝ երբ կնշանակվի

ՀՀ վարչապետի աշխատակազմից չեն հստակեցնում, թե Նիկոլ Փաշինյանը երբ մամուլի խոսնակ կնշանակի: Նշենք, որ այս պաշտոնը թափուր է 2021 թվականի նոյեմբերի 9-ից՝ շուրջ չորս ամիս: Factor.am-ի գրավոր հարցմանն ի պատասխան՝ ՀՀ կառավարությունից հայտնում են, որ մամուլի քարտուղար նշանակվելու դեպքում կլինի համապատասխան որոշում, որը կհրապարակվի կառավարության կայքում:

ՀՀ վարչապետի աշխատակազմում մամուլի խոսնակի բացակայությունը բարդացնում է լրագրողների աշխատանքը: Հրատապ թեմաների շուրջ ՀՀ վարչապետի տեսակետը ստանալու համար լրագրողները ստիպված են գրավոր հարցումներ ուղարկել, այնինչ ընդունված է, որ նման դեպքերում հենց խոսնակն է իրավասու ներկայացնել երկրի ղեկավարի դիրքորոշումը։ Նախկինում էլ մշտապես լրագրողները հրատապ հարցերի շուրջ հնարավորություն են ունեցել ճշտելու երկրի առաջին դեմքի դիրքորոշումը վերջիններիս խոսնակներից, մինչդեռ մասնագիտությամբ լրագրող վարչապետի աշխատակազմից անգամ հրատապ՝ օրվա համար կարևորություն ներկայացնող հարցերին ի պատասխան պահանջում են գրավոր հարցում։

Ուշագրավ է, որ ազատ մամուլի դերը մշտապես կարևորող Փաշինյանին չի անհանգստացնում այն հանգամանքը, որ մամուլի խոսնակ չնշանակելը բարդացնում է լրագրողների աշխատանքը:

Նիկոլ Փաշինյանը Հայաստանի վարչապետի պաշտոնում է շուրջ 4 տարի․ այդ ընթացքում հասցրել է արդեն մամուլի երեք խոսնակ փոխել: Հեղափոխությունից հետո այդ պաշտոնը ստանձնեց Արման Եղոյանը, որին խորհրդարան գնալուց հետո փոխարինեց Վլադիմիր Կարապետյանը, վերջինիս էլ՝ Մանե Գևորգյանը:

ՀՀ կառավարության կայքի համաձայն՝ այս պահին նաև թափուր են վարչապետի աշխատակազմի արտաքին հարաբերությունների վարչության պետի և արարողակարգի ու արձանագրային բաժինների պետերի պաշտոնները:

Նարեկ Կիրակոսյան