24.04.2026 | 00:23
Սպերցյանի գոլն օգնել է «Կրասնոդարին» հաղթել «Սպարտակին»․ ՏԵՍԱՆՅՈՒԹ
ՌԴ-ի հետ դաշնակցային պայմանագրի կնքումից հետո Ադրբեջանը չի շտապում աջակցել Ուկրաինային
Քաղաքականություն
25.02.2022 | 19:39
Ադրբեջանը, որը մշտապես աջակցություն է հայտնել Կիևի տարածքային ամբողջականությանը, ՌԴ-ից կողմից Ուկրաինայում իրականացվող ռազմական գործողությունների ֆոնին՝ չի շտապում իր աջակցությունը հայտնել Կիևին։ Ռազմական գործողությունների մեկնարկից ի վեր պաշտոնական Բաքուն լռություն էր պահպանում։ Միայն այսօր Ադրբեջանի նախագահի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը որոշ մեկնաբանություններ է տվել՝ կողմերից որևէ մեկին չսատարող։
Հաջիևը նշել է, որ Ադրբեջանը հանդես է գալիս Ուկրաինայի շուրջ ստեղծված իրավիճակը քաղաքական և դիվանագիտական ճանապարհով լուծելու օգտին։
«Ուկրաինայում տեղի ունեցող իրադարձությունները շարունակում են անհանգստություն առաջացնել: Ադրբեջանն աջակցում է քաղաքական-դիվանագիտական և երկխոսության միջոցով կարգավորմանը, և մեր դիրքորոշումն արտահայտվել է ԵԱՀԿ-ի կողմից կազմակերպված արտահերթ նիստում: Ադրբեջանը միշտ հավատարիմ է եղել միջազգային իրավունքի նորմերին և սկզբունքներին: Մեր երկիրը Չմիավորման շարժման նախագահն է և վճռականորեն աջակցում է Բանդունգի սկզբունքների գերակայությանը միջազգային հարաբերություններում և հանդես է գալիս այդ դիրքերից»,- ասել է Հաջիևը AZTV-ի հետ հարցազրույցում։
Հիշեցնենք՝ փետրվարի 22-ին Մոսկվայում ՌԴ-ի և Ադրբեջանի նախագահները ստորագրեցին երկու երկրների միջև դաշնակցային համագործակցության հռչակագիր։ Ադրբեջանի նախագահ Իլհամ Ալիևն օտարերկրյա երկրի առաջին ղեկավարն է, որը ՌԴ նախագահ Վլադիմիր Պուտինի կողմից Դոնեցկի ու Լուգանսկի ինքնահռչակ հանրապետությունների ճանաչումից հետո Մոսկվայում էր։
Ի դեպ՝ նոր հռչակագրով ՌԴ-ն և Ադրբեջանը ճանաչում են միմյանց տարածքային ամբողջականությունը։
Էմմա Չոբանյան
