13.12.2024 | 23:31
Գերմանիան հավանություն է տվել 2006թ․ ի վեր զենքի ամենամեծ արտահանմանը Թուրքիա
Ցեխոտ ու անանցանելի փողոցներ՝ Գյումրու Անի թաղամասում․ ի՞նչ լուծում է առաջարկում քաղաքապետարանը․ ԼՈւՍԱՆԿԱՐՆԵՐ
Հասարակություն
24.02.2022 | 22:14
Գյումրու ամենամեծ բնակելի թաղամասում՝ Անիում, մտահոգիչ վիճակ է ստեղծվել․ փողոցները դարձել են ցեխոտ, անանցանելի։ Բանն այն է, որ այս թաղամասում Գերմանական KFW բանկի միջոցներով ջրամատակարարման ցանցն է նորացվում, սակայն յուրաքանչյուր շենքի բակում կատարված շինաշխատանքներից հետո մեծ անհարմարություններ են ստեղծվում թաղի բնակիչների համար։
Անին 1988-ի երկրաշարժից հետո կառուցված թաղամասերից է, որտեղ գտնվում է նաև Շիրակի պետական համալսարանը։ Բնակիչները խնդրի մասին պարբերաբար ահազանգում են Գյումրու քաղաքապետարանի պաշտոնյաներին, և միայն այսօրվանից թաղամասում սկսվել են խճապատման աշխատանքները։
Գյումրու համայնքապետարանի «Կոմունալ ծառայություն բյուջետային հիմնարկ»-ի տնօրենի պաշտոնակատար Արման Շաբոյանը մեզ հետ զրույցում տեղեկացրեց, որ երեկ Գյումրու քաղաքապետ Վարդգես Սամսոնյանն ու ջրամատակարարման ցանցի նորացման աշխատանքները կատարող «Դորոժնիկ» ընկերության ներկայացուցիչները շրջայց են կատարել Անի թաղամասում, արձանագրել են, որ վիճակն, իրոք, շատ մտահոգիչ է։
«Դորոժնիկ» ընկերության ներկայացուցիչները խոստացել են խիճ տրամադրել, քաղաքապետարանն էլ՝ իր տեխնիկան։
Գյումրի քաղաքի գլխավոր ճարտարապետ Հենրիկ Գասպարյանն էլ վստահեցնում է, որ թաղամասն այս տարի ասֆալտապատվելու է․ երկու փողոց կասֆալտապատվի KFW-ի միջոցներով, մնացածը՝ Վերակառուցման և զարգացման եվրոպական բանկի։
Ըստ ճարտարապետի՝ խճապատումն այս պահին կատարում են, որպեսզի բնակիչների համար ստեղծված անհարմարությունները գոն փոքր-ինչ շտկեն, մինչև որ հիմնավոր լուծում տան խնդրին։
Արմիկ Մովսիսյան
