Չինաստանը հրաժարվել է Ուկրաինայի վրա ՌԴ-ի հարձակումը «ներխուժում» անվանել

Չինաստանի ԱԳ նախարարության խոսնակը հինգշաբթի հրավիրված ասուլիսի ժամանակ հրաժարվել է Ռուսաստանի հարձակումը որակել «ներխուժում», գրում է CNBC-ն:

Ռուսաստանի նախագահ Վլադիմիր Պուտինն ավելի վաղ հայտարարել էր Ուկրաինայի վրա հարձակման մասին, որին հաջորդել են պայթյուններ Կիևում և Ուկրաինայի այլ քաղաքներում։ Ուկրաինայի զինված ուժերը պնդում են, որ կռվում են իրենց հողում, իսկ նախագահ Վլադիմիր Զելենսկին բռնությունը որակել է որպես «ներխուժում՝ երկիրը ոչնչացնելու համար»:

Մի քանի ժամվա ընթացքում ԱՄՆ-ի, Գերմանիայի, Միացյալ Թագավորության և այլ երկրների ղեկավարները դատապարտել են ՌԴ-ի հարձակումը:

Չինաստանի արտաքին գործերի նախարարի օգնական Հուա Չունինին լրագրողները մի քանի անգամ հարցրել են՝ արդյո՞ք նա Ռուսաստանի հարձակումը ներխուժում է որակում, բայց նա խուսափել է «այո» կամ «ոչ» պատասխանելուց:

Հուան հայտարարել է, որ Ռուսաստանն «անկախ խոշոր պետություն է», որը կարող է  ինքնուրույն գործողություններ իրականացնել։ Նա մի քանի անգամ անդրադարձել է Ուկրաինայի վերաբերյալ ՌԴ իշխանությունների հայտարարություններին, մասնավորապես՝ Մոսկվայի ՊՆ հայտարարությանը, որ ՌԴ Զինված ուժերը հարվածներ չեն հասցնում Ուկրաինայի քաղաքներին։

«Չինաստանն ուշադիր հետևում է իրավիճակի զարգացմանը։ Այն, ինչ դուք տեսնում եք այսօր, այն չէ, ինչ մենք ցանկանում էինք տեսնել։ Մենք հույս ունենք, որ բոլոր կողմերը կարող են վերադառնալ երկխոսության և բանակցությունների»,- ասել է Հուան:

Տաթև Ֆռանգյան