Ամփոփվել է կրթության զարգացման պետական ծրագրի հանրային քննարկումների շարքը

«Հայաստանի Հանրապետության կրթության՝ մինչև 2030 թվականը զարգացման պետական ծրագրի›› նախագծի հանրային քննարկումների շարքն ամփոփվել է նախարարին կից հասարակական խորհրդի նիստում: Հանդիպումը վարել է խորհրդի նախագահ, ԿԳՄՍ նախարար Վահրամ Դումանյանը․ տեղեկացնում են ԿԳՄՍՆ-ից։

Ողջունելով խորհրդի անդամներին՝ Վահրամ Դումանյանը նշել է, որ 2015 թվականից ի վեր տարբեր պատճառներով բացակայել է կրթության զարգացման ռազմավարությունը: Նրա խոսքով՝ ներկայում շրջանառվում է ոլորտի կարևորագույն փաստաթուղթ, և նախարարությունն ակնկալում է լսել նոր գաղափարներ՝ նախագիծը բարելավելու նպատակով:

«Այսպիսի փաստաթղթերը երբեք հնարավոր չէ բերել իդեալական տեսքի և ունենալ բոլոր շահագրգիռ կողմերի փոխհամաձայնությունը, սակայն դա չի նշանակում, որ պետք է դրան չձգտել: Ծրագրում սահմանել ենք մինչև 2030 թվականը կրթության ոլորտի տեսլականը, թիրախները և հիմնական սկզբունքները, որոնք մեր գործընկերների հետ ցանկանում ենք իրականություն դարձնել: Նախագծի հիմքում դրված է երկու կարևորագույն սկզբունք. առաջին՝ յուրաքանչյուր ոք ունի թաքնված շնորհներ և տաղանդ, և լրջագույն խնդիր է դրանք բացահայտելը: Երկրորդ՝ մարդն իր ողջ կյանքի ընթացքում անցնում է որոշակի կրթական գործընթացի միջով՝ ֆորմալ և ոչ ֆորմալ, ու բոլոր այդ փուլերում կրթական որակը պետք է լինի հնարավորինս բարձր և մրցունակ, կառուցվի ազգային արժեքների հիման վրա՝ միաժամանակ լինելով համամարդկային արժեքներին համահունչ, և այդ ամենը ի վերջո ծառայի մեր երկրին, ժողովրդին ու տնտեսության հզորացմանը»,- նշել է նախարար Վահրամ Դումանյանը:

Նախարարի բացման խոսքից հետո ԿԳՄՍ նախարարի տեղակալներ Արթուր Մարտիրոսյանը, Ժաննա Անդրեասյանը և Կարեն Թռչունյանը, ըստ իրենց համակարգման ոլորտների, ներկայացրել են կրթության զարգացման ծրագրի ընդհանուր գործընթացը, ռազմավարական ուղղությունները և առաջնահերթությունների առանցքային դրույթները, ինչպես նաև ժամանակացույցը:

ԿԳՄՍ նախարարի տեղակալ Արթուր Մարտիրոսյանը ներկայացրել է զարգացման ռազմավարության ընդհանուր գործընթացը և ժամանակացույցը, Ժաննա Անդրեասյանը՝ նախադպրոցական, հանրակրթության, նախնական և միջին մասնագիտական, իսկ Կարեն Թռչունյանը՝ բարձրագույն կրթության ոլորտներում մինչև 2030 թվականը վերին մակարդակի հիմնական որակական ցուցանիշները, ռազմավարության հիմնական թիրախները և սկզբունքները:

Բանախոսների զեկույցներից հետո ծավալվել է շահագրգիռ քննարկում, որի ընթացքում ներկաները ներկայացրել են իրենց դիտարկումներն ու առաջարկությունները՝ գոհունակությամբ փաստելով, որ իրականացվել է մեծ ծավալի աշխատանք: Նախարարին կից հասարակական խորհրդի անդամները մի շարք հարցեր են հղել զեկուցողներին: Խորհրդի անդամներին մասնավորապես հետաքրքրել են հանրակրթության ոլորտում ֆինանսավորման մեխանիզմների, կրթություն-աշխատաշուկա կապի, ծրագրում մշակութային կրթության և ֆիզկուլտուրայի բաղադրիչի ներառման, ազգային փոքրամասնությունների՝ մայրենի լեզվով որակյալ կրթություն ստանալու, դպրոցների կառավարման խորհուրդների, բուհերի ծրագրային և ինստիտուցիոնալ հավատարմագրման, ԲՏՃՄ առարկաների գծով ուսուցիչների համալրման խնդիրները: Խորհրդի անդամներին հետաքրքրել է նաև, թե արդյոք ծրագրի գործողությունների պլանում սահմանվել են հստակ ցուցանիշներ՝ նախագծում տեղ գտած հավակնոտ թիրախներին հասնելու համար:

Ի պատասխան՝ նախարարի տեղակալ Արթուր Մարտիրոսյանը նշել է, որ օրենքն ուժի մեջ մտնելուց հետո՝ եռամսյա ժամկետում, ՀՀ կառավարությունը պետք է հաստատի «Հայաստանի Հանրապետության կրթության՝ մինչև 2030 թվականը զարգացման պետական ծրագրից» բխող գործողությունների ծրագիրը, և ռազմավարական ուղղություններով նախատեսվող քայլերը տեղ են գտնելու վերոնշյալ փաստաթղթում: Փոխնախարարը շեշտել է, որ նախագծով սահմանվել են հստակ չափելի արդյունքներ ինչպես 2030 թվականի, այնպես էլ միջանկյալ՝ 2026 թվականի համար:

Ամփոփելով նիստը՝ նախարար Վահրամ Դումանյանը շնորհակալություն է հայտնել ներկաներին շահագրգիռ և կառուցողական քննարկման համար՝ ընդգծելով, որ հնչեցված բոլոր առաջարկները կքննարկվեն և ըստ անհրաժեշտության՝ տեղ կգտնեն նախագծում:

Նիստի ավարտին ԿԳՄՍ նախարարին կից հասարակական խորհուրդը հավանության է արժանացրել ‹‹Հայաստանի Հանրապետության կրթության՝ մինչև 2030 թվականը զարգացման պետական ծրագրի›› նախագիծը: