24.04.2026 | 00:23
Սպերցյանի գոլն օգնել է «Կրասնոդարին» հաղթել «Սպարտակին»․ ՏԵՍԱՆՅՈՒԹ
Էրդողանը Պուտինին ասել է, որ Անկարան չի ճանաչում Ուկրաինայի ինքնիշխանությանն ու ամբողջականության ոտնահարմանն ուղղված քայլերը
Քաղաքականություն
23.02.2022 | 20:10
Թուրքիայի նախագահ Ռեջեփ Թայիփ Էրդողանըս հեռախոսազրույց է ունեցել ՌԴ նախագահ Վլադիմիր Պուտինի հետ։ «Անադոլու»-ի փոխանցմամբ՝ այս մասին հայտնել է Թուրքիայի նախագահի աշխատակազմի հասարակայնության հետ կապերի բաժինը։
Նշվում է, որ երկու երկրների ղեկավարները քննարկել են Ուկրաինայի շուրջ իրավիճակը։ Էրդողանն ընդգծել է, որ միշտ առանձնահատուկ նշանակություն է տվել Պուտինի հետ սերտ երկխոսությանը տարածաշրջանային հարցերում, որը հանգեցրել է դրական արդյունքների։ Անկարան պահպանում է վճռականությունը՝ աջակցելու առկա փոխըմբռնմանը։
Թուրքիայի նախագահը, միաժամանակ, ընդգծել է, որ Անկարան չի ճանաչում քայլերը, որոնք ուղղված են Ուկրաինայի ինքնիշխանության ու տարածքային ամբողջականության ոտնահարմանը, և «դա Անկարայի սկզբունքային դիրքորոշումն է»։ Թուրքիայի ղեկավարն ընդգծել է Մինսկի պայմանավորվածությունների հիման վրա արդյունքների հասնելու անհրաժեշտությունը։
Էրդողանը նշել է, որ առկա խնդիրների բարդացումը, մասնավորապես՝ ռազմական առճակատումը ոչ մեկին օգուտ չի բերի։
«Անկարան մեծ նշանակություն է տվել և կարևորում է դիվանագիտական շփումների ու բանակցությունների շարունակությունը և պատրաստ է նպաստել լարվածության նվազեցմանն ու խաղաղության պահպանմանը»,- ասել է Էրդողանը։
Թուրքիայի նախագահը կրկին հնչեցրել է երկխոսության և դիվանագիտության առաջնահերթության կոչը՝ նշելով, որ «Անկարան կառուցողական մոտեցումներ է պահպանում նաև ՆԱՏՕ-ի ներսում»։
Էրդողանը հավելել է, որ ակնկալում է Պուտինի շուտափույթ այցը Թուրքիա՝ մասնակցելու Բարձր մակարդակի ռազմավարական խորհրդի նիստին, որի մասին պայմանավորվածություն էր ձեռք բերվել 2021 թվականի սեպտեմբերին Սոչի կատարած այցի ժամանակ։
Էմմա Չոբանյան
