18.12.2025 | 19:39
Կայացել է ՀՀ-ԱՄՆ աշխատանքային խմբի անդրանիկ հանդիպումը
Բաքուն զայրացել է ՌԴ ԱԳՆ հրապարակումից. Թուրքմենչայի պայմանագրով՝ Երևանի ու Նախիջևանի խանությունները Արևելյան Հայաստան են
Քաղաքականություն
23.02.2022 | 15:44
Պաշտոնական Բաքուն իր տարակուսանքն ու ափսոսանքն է հայտնել ՌԴ ԱԳ նախարարության՝ նախօրեին արված հրապարակման համար, որը նվիրված է Թուրքմենչայի պայմանագրի կնքմանը։ Պատմության ու պատմական փաստերի խեղաթյուրմամբ ու կեղծմամբ զբաղվող Ադրբեջանը բողոքել է, որ հայտարարության մեջ, իբր, «ադրբեջանական տարածքները» ներկայացվել են Արևելյան Հայաստան։
«Զարմանալի և ցավալի է, որ Ռուսաստանի Դաշնության ԱԳ նախարարության սոցիալական ցանցի պաշտոնական էջը խեղաթյուրված տեղեկատվություն է հրապարակել 1828 թվականի Թուրքմենչայի պայմանագրի վերաբերյալ՝ Ադրբեջանի և Ռուսաստանի միջև դաշնակցային փոխգործակցության մասին հռչակագրի ստորագրման օրը»,- ասվում է Ադրբեջանի ԱԳՆ հայտարարության մեջ։
Նշվում է, որ պայմանագրի տեքստում, իբր, Արևելյան Հայաստան արտահայտություն որևէ կերպ չի նշվում, և որ այդ «փաստը» քաջ հայտնի է ՌԴ ԱԳՆ-ին։ Ադրբեջանի ԱԳՆ-ն անհրաժեշտ է համարում, որ «ՌԴ ԱԳՆ-ն այդ սխալն ուղղի սոցիալական ցանցի իր էջում ու վերացնի խեղաթյուրումը»։
Հավելենք, որ նախօրեին ՌԴ ԱԳՆ-ն 1828 թվականի փետրվարի (10) 22-ին կնքված Թուրքմենչայի պայմանագրի առթիվ հրապարակում է արել, որում նշվում է նաև Արևելյան Հայաստանի մասին։
«Ռուսական կայսրության տիրապետության տակ անցան Երևանի և Նախիջևանի խանությունները (Արևելյան Հայաստան): Իրանի կառավարությունը պարտավորվեց չխոչընդոտել հայերի վերաբնակեցմանը այդ խանությունների տարածքում ստեղծված Հայկական մարզում, որն էլ նպաստեց Ռուսական կայսրության կազմում հայ ժողովրդի միավորմանը»,- ասվում է ՌԴ ԱԳՆ հրապարակման մեջ։
Էմմա Չոբանյան
