Ալիևը Պուտինի հետ հանդիպմանը պահանջել է «Արցախից հայկական ուժերի դուրսբերում և Նախիջևանի հետ հաղորդակցության ապահովում»

Ադրբեջանի նախագահ Իլհամ Ալիևը կրկին յուրովի է մեկնաբանել 2020 թվականի նոյեմբերի 9-ին ՀՀ-ի, ՌԴ-ի և Ադրբեջանի ղեկավարների միջև ստորագրված եռակողմ հայտարարությունը։ Մասնավորապես, նախօրեին ՌԴ նախագահ Վլադիմիր Պուտինի հետ երկու երկրների միջև դաշնակցային հռչակագրի ստորագրման արարողության ժամանակ Ալիևը հայկական կողմին մեղադրել է եռակողմ հայտարարության կետերը չկատարելու մեջ, գրում են ադրբեջանական լրատվամիջոցները։

«Մենք ակնկալում ենք, որ հայկական կողմը լիովին կկատարի 2020թ․ նոյեմբերի 9-10-ի համաձայնության բոլոր կետերը՝ կապված Ղարաբաղի տարածքից հայկական զինված ուժերի դուրսբերման, ինչպես նաև Ադրբեջանի հիմնական մասի ու Նախիջևանի Ինքնավար Հանրապետության միջև հաղորդակցության բացման հետ, որը հանդիսանում է հայկական կողմի իրավական պարտավորությունը, սակայն այդ ուղղությամբ աշխատանքը շատ դանդաղ է ընթանում»,- ասել է Ալիևը։

Նշենք, սակայն, որ Արցախի Պաշտպանության բանակի ուժերի դուրսբերման դրույթ նոյեմբերի 9-ի եռակողմ հայտարարության մեջ չկա։ Ուշագրավ է նաև այն, որ Ալիևը Պուտինի ներկայությամբ կրկին չի խոսել ադրբեջանական քարոզչական թեզից՝ այսպես կոչված, «Զանգեզուրի միջանցքից», այլ ընդամենը հաղորդակցությունից։

Բացի այդ, Ալիևը նշել է Պուտինի կարևոր դերակատարումը պատերազմի դադարեցման գործում։

«Այսօր Ռուսաստանը մեր գլխավոր գործընկերն է Ադրբեջանի և Հայաստանի միջև հարաբերությունների կարգավորման ուղիների որոնման գործում։ Դրա հնարավորությունները կան։ Ադրբեջանը մեկ անգամ չէ, որ հայտարարել է խաղաղության պայմանագրի վրա աշխատելու պատրաստակամության մասին, որն ընդգրկելու է սահմանների ճշգրտման, դելիմիտացիայի և այլ հարցեր, որոնք անհրաժեշտ են ցանկացած երկրների, որոնք ուզում են հարաբերությունները կարգավորել»,- հայտարարել է Ալիևը։

Էմմա Չոբանյան