26.11.2024 | 23:20
Ադրբեջանում պահեստազորի սպաները բողոքի ակցիա են անցկացրել՝ պահանջելով իրենց հասանելիք վճարումները
ՄԱԿ-ի գլխավոր քարտուղարը գնահատել է Դոնբասում տիրող իրավիճակը
Քաղաքականություն
23.02.2022 | 13:14
ՄԱԿ-ի գլխավոր քարտուղար Անտոնիո Գուտերեշը հայտարարել է, որ Ուկրաինայի արևելքում տեղակայված ռուսական զորքերը չեն կարող համարվել «խաղաղապահներ», ինչպես պնդում է Մոսկվան։ Այս մասին ասվում է կազմակերպության կայքում հրապարակված հաղորդագրության մեջ, գրում է korrespondent-ը։
Այսպիսով, Գուտերեշը մեկնաբանել է Ռուսաստանի Դաշնության կողմից ինքնահռչակ Դոնեցկի և Լուգանսկի հանրապետությունների ճանաչումը և նշել, որ այս որոշմամբ Ռուսաստանը «մահացու հարված հասցրեց մինսկյան համաձայնագրերին»։
«Երբ մի պետության զորքերը մտնում են մեկ այլ պետության տարածք՝ առանց նրա համաձայնության, նրանք չեզոք խաղաղապահներ չեն, նրանք ամենևին էլ խաղաղապահ չեն»,- ասել է Գուտերեշը ՄԱԿ-ում լրագրողների հետ զրույցում։
Նա նաև նշել է, որ ճանաչելով անջատողական շրջանները՝ Ռուսաստանը խախտել է Ուկրաինայի տարածքային ամբողջականությունն ու ինքնիշխանությունը։
«Մեր աշխարհը բախվում է խաղաղության և անվտանգության ամենամեծ գլոբալ ճգնաժամին վերջին տարիներին, հատկապես իմ՝ գլխավոր քարտուղարի պաշտոնավարման ընթացքում: Մենք հասել ենք մի վիճակի, որը, անկեղծորեն հույս ունեի, չի գա: Ես խորապես անհանգստացած եմ Ուկրաինայի հետ կապված վերջին զարգացումներով, այդ թվում՝ շփման գծի երկայնքով հրադադարի խախտումների ավելացման և տեղում հակամարտության հետագա սրման իրական վտանգի մասին տեղեկություններով»,- ասել է ՄԱԿ-ի գլխավոր քարտուղարը։
Տաթև Ֆռանգյան
