26.11.2024 | 23:20
Ադրբեջանում պահեստազորի սպաները բողոքի ակցիա են անցկացրել՝ պահանջելով իրենց հասանելիք վճարումները
Էնթոնի Բլինքենը չեղարկել է Սերգեյ Լավրովի հետ հանդիպումը
Քաղաքականություն
23.02.2022 | 12:19
ԱՄՆ պետքարտուղար Էնթոնի Բլինքենը չեղարկել է Ռուսաստանի արտգործնախարար Սերգեյ Լավրովի հետ հանդիպումը։ Այդ մասին նա հայտարարել է փետրվարի 22-ին, Ուկրաինայի արտգործնախարար Դմիտրի Կուլեբայի հետ հանդիպմանը հաջորդած ճեպազրույցում։
Հանդիպումը պետք է կայանար փետրվարի 24-ին։ Բլինքենն ընդգծել է, որ դրա անցկացման պայմանը Ռուսաստանի կողմից Ուկրաինա ներխուժումից հրաժարվելն է։
«Անցյալ շաբաթ ես առաջարկել էի Լավրովի հետ հանդիպում անցկացնել, բայց պայմանով, որ Ռուսաստանը չներխուժի Ուկրաինա: Այժմ մենք տեսնում ենք, որ ներխուժումը սկսվել է: Ուստի՝ անիմաստ է այս հանդիպումն այժմ անցկացնել»,- ասել է Բլինքենը:
Բլինքենը հավելել է, որ իր որոշման մասին Լավրովին տեղեկացրել է նամակով։
Նա նաև վստահեցրել է, որ ԱՄՆ-ը դեռ հույսը դնում է հակամարտության դիվանագիտական կարգավորման վրա, սակայն դրա համար Ռուսաստանը պետք է հաստատի իրավիճակը խաղաղ ճանապարհով կարգավորելու իր մտադրությունը։
Տաթև Ֆռանգյան
